Şaredarîya Şaristanê Girdî programê piştîdayîşê xo yê perwerdeyî dewam kena. Amanc o yo ke seypêyîya firsendan a perwerdeyî xurt bibo û mesrefanê perwerdeyî yê wendekaranê neweyan rê piştî bêro dayîş. Program hetê Serekîya Daîreya Xizmetanê Komelkîyan ra yeno ramitiş; bi programî barê mesrefanê perwerdeyî yê wendekar û keyeyanê ke hewceyê piştîdayîşê ekonomîkî yê, do sivik bibo.

Bi pêroyî 25 hezar TL piştîdayîş

Wendekaran rê ke şertan anê ca, bi pêroyî 25 hezar TL do bêro dayîş. Yeno plankerdiş ke pere bi di taksîtan bêro dayîş: teşrîna peyêne 2026 de 10 hezar TL, nîsane 2027 de 15 hezar TL. Goreyê butçe û şertanê tatbîqî, pere eşkeno yew rey de bêro dayîş yan zî miqdarê taksîtan eşkeno bivurîyo.

Muracatî 7–25ê teşrîna verêne de yenê girewtiş

Muracatî adresa egitimdestek.diyarbakir.bel.tr ser ra yenê kerdiş. Wendekarê ke bi îmtîhanê qabîlîyetê pêroyî kewtî unîversîteyanê dewlete û wendekarê programanê bi bursê %100 yê unîversîteyanê weqfî/taybetî, ganî belgeyanê xo yê cabîyayîş û wendekarîye bi destê xo teslîmê Serekîya Daîreya Xizmetanê Komelkîyan bikerê.

Şertê muracatî

Wendekarê ke goreyê netîceyanê cabîyayîşî yê OSYM 2026 reya verêne dekewtî programanê verlîsans yan lîsansî yê unîversîteyanê dewlete, yan zî programanê verlîsans yan lîsansî yê bi bursê %100 yê unîversîteyanê weqfî/taybetî, eşkenê îstîfade bikerê. Ganî wendekarî verê 21ê temmuze 2026 ra nat Amed de biciwîyê, binê 30 serreyan de bê û goreyê rewşa xo ya ameyeyî hewceyê piştîdayîşî bê.

Belgeyê lazimî

Muracatan de belgeyê wendekarîye yo aktîf, belgeyê cayê ciwîyayîşî yo bitarîx, belgeyo ke kesanê eynî keyeyî mojneno û bordroyê maaşî yê şeş aşmanê peyênan ê pî û maye yan zî lîsteyê xizmetî yê SGK'yî do bêrê waştiş. Ganî pî û mayê ke nêxebitîyenê zî lîsteyê xizmetî yê SGK'yî bidê. Seba ke pere bêro dayîş, ganî wendekarî IBANê hesabê banka yê nameyê xo bidê; IBANê may yan zî pîyî zî yeno waştiş. Hesabê banka yê wendekaranê binê 18 serreyan de bi îznê may û pîyî abeno.

Kamî nêeşkenê îstîfade bikerê?

Wendekarê ke şaredarîyanê qezayan ê Amedî ra piştîdayîşê perwerdeyî gênê, eynî demî de nêeşkenê piştîdayîşê Şaredarîya Şaristanê Girdî ra îstîfade bikerê. Wendekarê wendişo akerde, wendişê dûrî û wendişo dîyin û wendekarê ke welatanê teberî de, Qibris zî tede, wanenê, çarçewaya programî de nîyê.

Açarnayox: Mehmet Olmez