Hevşaredarên Bajarê Mezin Serra Bucak û Dogan Hatun, têkildarî projeyên geşepêdana bajêr bi Midûrê Tirkiyeyê yê Banka Cîhanê Humberto Lopez re hevdîtin kir.

Hevşaredarên Bajarê Mezin ê Amedê Serra Bucak û Dogan Hatun ku li Enqereyê peywendiyên xwe didomînin, bi Midûrê Tirkiyeyê yê Banka Cîhanê Humberto Lopez û ekîba wî re hevdîtinek pêk anîn.

Di hevdîtinê de derfetên fînansî û piştgiriya teknîkî yên li gorî pêşengên pêşketina Amedê bi berfirehî hatin nîqaşkirin. Di civînê de bal hat kişandin ser projeyên wekî pêşkeftina binesaziya bajarî, rêveberiya rîska karesatê, veberhênanên enerjiya nûjen û nûjenkirina pergalên veguheztina giştî, li ser vebijarkên fînansekirinê yên wekî derfetên deynên demdirêj ên kêm-faîz, şertên dravdana maqûl û piştgiriya bexşînê nîqaş kirin.

Her wiha rola piştgiriya teknîkî û şêwirmendiyê ya ku ji aliyê Banka Cîhanî ve tê pêşkêşkirin di zêdekirina kapasîteya şaredariyê de hate destnîşankirin.

Proje hatin rojevê

Di civînê de ji bo Projeya Başkirina Xizmetên Şaredariyê ya ku niha Diyarbekir di nav xwe de ye, Projeya Pêşvebirina Dora Avê û Bikêrhatîbûna Tirkiyeyê û Projeya Pîşesaziya Kesk a Tirkiyeyê de beşdarbûna aktîftir a şaredariyê hat xwestin. Her wiha gavên pêwîst hatin nîqaşkirin ku bernameyên wekî Projeya Bajarên Berxwedêr ên Avhewa û Afatê, Projeya Bajarên Berdewam 2 û Projeya Enerjiya Vejenê ku heta niha li Amedê nehatine tetbîqkirin, lê tê plankirin ku di nava projeyê de cih bigirin. Di encama civînê de biryar hat dayîn ku di çarçoveya rêgezên şefafî û berpirsiyariyê de di pêvajoyên fînansekirinê de tevbigerin û ji bo ku Amed di pêşketina herêmê de roleke bibandortir bigire dest, hevkariya stratejîk bê zêdekirin.

Di civînê de Sekreterê Giştî Emrullah Gorduk, Serokê Daîreya Proje û Lêkolînê Murat Akbaş û Seroka Daîreya Teknolojiya Agahiyê Berçim Guzel bi Hevşaredaran re bûn.