Hevseroka Şaredariya Bajarê Mezin Serra Bucak, di boneya 8'ê Adarê Roja Jinên Cîhanê de bi karmendên jin ên şaredariyê re hat ba hev û got, "Divê em cihên taybet ên jinan, cihên ku jin tê de tên ba hev, gotin dikin û derfetan zêde bikin."

Meclisa Jinan a Şaredariya Bajarê Mezin a Amedê, di boneya Roja Jinên Cîhanê de heta 8'ê Adarê, dê bi karmendên jin ên di beşên şaredariyê de dixebitin re were ba hev. Di vê çarçoveyê de, civîna yekemîn a ku dê were lidarxistin, bi beşdariya Hevseroka Şaredariya Bajarê Mezin Serra Bucak li cihekî li navçeya Kayapınarê pêk hat.

Hevşaredar Bucak: Divê em qadên jinan zêde bikin

Hevşaredar Serra Bucak di çalakiyê de axivî û bal kişand ser pêwîst e jinên xebatên xwe geş bikin û bêhtir bên ba hev: "Dema ku têkoşîna jinê hinekî lawaz dibe, em bi hêza li hemberî xwe, bi zihniyeta mêrên nêr re rû bi rû dimînin, li her derê, lê herî zêde di qada giştî de, herî zêde di cihên ku em dixebitin de, di her qada jiyana me de cihên ku em dixwazin hebin, her deverên ku jin dixwazin dengê xwe bilind bikin, mixabin em rû bi rû dimînin. Divê em bi rastî qadên taybet ên jinan, têkoşîna rêxistinî ya jinan, cihên ku jin tên ba hev, gotina xwe berz dikin, qadan û îmkanan zêde bikin."

'Li dinyayê tu civateke din nîne ku vê serfiraz bike'

Hevserok Bucak bi bîr anî ku ji roja ku ew hatine ser kar ve 11 meh derbas bûne û wiha domand: "Ji roja ku em hatine ser kar ve, tevî zehmetiyan jî, me motîvasyon û enerjiya xwe qet winda nekir û em bi vê serbilind in. Di vê pêvajoya ku nayê pêşbînîkirin û ne hêsan e de, hemû hevalên me beşdariyeke mezin kirin. Piştî 8 salên tayînkirina qeyûman, anku di hilbijartinên 31'ê Adarê 2024'an de, gelê kurd cardin li îradeya xwe xwedî derket. Hem partiya we, hem endamên meclisê yên hilbijartî, rêveberiya me, hem jî hevalên jin, me rexneyên tund li dijî perspektîfa qeyûman berz kirin. Di vê pêvajoya ku nayê pêşbînîkirin de, me 11 mehên xwe tijî kir. Ez spasiya xebata hemû hevalan dikim. Li tu derê dinyayê tu hêzek din, tu civakek din nîne ku vê serfiraz bike. Çima ez vê dibêjim? Di pêvajoyeke ku nayê pêşbînîkirin de, bêyî ku mirov bizanibe ku sîstem çi planan li ser me dike, di atmosfereke ku her dem şûrê qeyûm li ser serê me diheje de, bi taybetî xebata hevalên jinên hilbijartî û xebata her kesî hêjayî pesindanê ye."

'Divê em zêdetir li vê xebatê xwedî derkevin'

Hevserok Bucak destnîşan kir ku xebatên ku di van qadan de tên kirin û xwedîderketina karmendan li beşên xwe gelek girîng e û wiha got: "Ji vî aliyî ve, ez difikirim ku em di xaleke gelek girîng û baş de ne. Ez difikirim ku em di cihekî de ne ku em hev gelek pêş dixin. Bêguman sedemên vê yên dîrokî hene. Em jinên kurd, bi taybetî jinên ku li vê herêmê dijîn, em ji têkoşîna rêxistinî ya jinan, ji têkoşîna taybet a jinan gelek tişt fêr bûn. Me li ser vê tecrûbeyê gelek pêşketinên girîng zêde kirin; hem di qada giştî de, hem di qada temsîla siyasî de, hem di rêveberiyên herêmî de, hem jî di saziyên taybet ên jinan de. Îro, wek encama hemû van, hûn hemû li vir in. Ev tiştên ku me afirandiye, xebata we hemûyan, ya me hemûyan e. Û îro xwedîderketina li vê xebatê ji duhî gelekî girîngtir e. Divê em zêdetir xwedîtiyê lê bikin."

'Divê em dengê xwe zêdetir berz bikin'

Hevşaredar Bucak diyar kir ku hem sepandina qeyûman hem jî zordestiya li ser jinan berdewam dike û wiha got: "Tundiya li malê, tundiya di nav malbatê de, tundiya ku dewlet dike, tundiya ku ji ber siyaseta bêcezabûnê ji aliyê mêran ve tê meşandin... Em ê helbet li dijî vê tundiyê di 8'ê Adarê de li qadan bin. Beriya wê jî, ji bo ku Meclisa Jinan bêhtir bi hev re parve bike, pirsgirêkên hevpar ên ji jinbûnê bêhtir bibîne; bêhtir dengê hev bibihîze, dest bide hev, em ê werin ba hev."

'Hemû ev tişt me bêhtir xurt dikin'

Hevşaredar Bucak bang kir ku çalakiyên ku ji aliyê Meclisa Jinan ve tên organîzekirin divê ji aliyê jinan ve bên şopandin û got: "Li wir em hebûna xwe bi hêz hîs bikin, bibêjin 'em li vir in'. Bibêjin Meclisa Jinan li vir e, rêxistinbûna jinan li vir e. Ev hemû gelek girîng in. Ev hemû, hem di nav civakê de, hem di cihên ku em lê dixebitin de, hem di nav malbatê de, hem jî di cihên ku em tên temsîlkirin de, xalên bihêzker in, her yek xalên gelek hêja ne. Ji ber vê yekê, divê em hemû bi hev re li van xalên hêja, li van qadan xwedî derkevin."