Kombîyayîşê ma yo ke ma bi sloganê “Îdare û Xebatê Afate” organîze kerd, temsîlkarê rêxistinê sivîlan seba hazirî û mudaxeleyê afate waştiş û pêşînayazê xo îfade kerdî.

Kombîyayîşê Şaredarîya Şaristanê Girdî yê Amedî ke seba Planê Stratejîk yê 5 serran yenê kerdene, dewam kenê. Merkezê Kultur û Kongreyî de bi temsîlkaranê rêxistinanê sivîlan kombîyayîşê “Grûba Fokusî” yo 5. “Îdare û Xebatê Afate” temam bî. Hetkarê Sekreterîya Şaredarîya Şaristanê Girdî Ozgur Yildiz, DTSO, Egitim-SEN, SES, Odaya Tabîbab a Amedî, Odaya Beytaran, TUM-BEL-SEN, Merkezê Cigêrayîşê Sosyopolîtîkan, DMS û xeylê temsîlkarê rêxistinan beşdarê kombîyayîşî bî.

'Şaredarî û STO’yî ganî pîya bixebitîyê'

Hetkarê Sekreterîya Şaredarî Ozgur Yildizî kombîyayîşî de qisey kerd û dîyar kerd ke ê seba planê stratejîk yê 5 serran ameyî têhet û sipasîya beşdaran kerd ke beşdarê kombîyayîşî bîyî. Yildizî ard ziwan ke ganî Serekîya Daîreya Karê Afate şaredarîyan de bêrê akerdene û bale ante xebitîyayîşê şaredarî û STO’yan. Yildiz wina va: “Ma waştiş û pêşnîyazê şima goşdaritî, ma not kerdî û ma do dekerê plananê xo mîyan.”

'Do xebatê ma yê zanistî bibê'

Serekê Daîreya Karê Afate Murat Emînogluyî zî ard ziwan ke ê xebityayîşê beşdarbîyayoxî muhîm vînenê û wina dewam kerd; “Çend babetê ma yê sereke est ê. Nê, hazirîya afate, mudaxeleyê afate û afate ra dima başkerdiş ê. 6ê sibate 2023î de ma erdlerzî de hem can û zî malê xo û sewbîna hetê psîkolojî û ekonomîyî ra zaf çîyê xo vindî kerdî. Nê tewir afatî seba ke vernîya înan bêro girewtene, do xebatê ma yê zanistî bibê.

Emînogluyî derheqê karê daîreya înan de û yê Merkezê Koordînasyonê Afate de melumatî dayî

'Ganî Planê Afate bêrê kerdene'

Kombîyayîşî de temsîkaranê STO’yan fikir û pêşnîyazê xo vatî û dîyar kerd ke seba ke vernîya afatan bêro girewtene gamî bêrê eştene û wexto ke ruhsat yeno dayene wa hertim afate vîrê ma de  bibo. Çend pêşnîyazî wina yê; Bê ke destûrê muhendîs û mîmaran bibo ganî ruhsat nêro dayîş. Planê Afate bêrê kerdene. Şaristanî de heme awanî bêrê kontrolkerdene. Dewe û qezayan de yewnîyê îtfaîyeyan bêrê awankerdene.