Serekê Mudirîya Pêroyî ya DÎSKÎ Mehmet Şerîfogluyî dîyar kerd ke, ê îdîayê ‘awa şimitişî ra nêweşîye vila bena’ rast nîyê û biqestî yenê vilakerdene. Şerîfogluyî wina dewam kerd; “Roj bi roj heme analîz û kontrolî awa ma ya şimitişî de yenê kerdene û awa ma de nêweşîye çin a, biweşî ya. Senî ke heta ewro şarê ma bêteredut awe şimitêne, nika ra pey zî şêno bişimo.”

Mudirê Pêroyî yê DÎSKÎ Mehmet Şerîfogluyî derheqê îdîayê awa şimitişî de îzahatêk da û ard ziwan ke nê îdîayî biqestî yenê eştene ke rehetî û aramîya şarê ma bihermnê. Şerîfogluyî dîyar kerd ke awe her roj yena analîzkerde û şar birehetî şêno bişimo.

‘Nêweşîyê ke seba mewsimî vêşî benê, berpirsîyarîya DÎSKÎ de nîyê’

Şerîfogluyî îfade kerd ke ê sey Mudirîya Pêroyî ya DÎSKÎ nêzdîya 2 mîlyon însanan rê awa pake 7/24 resnenê û wina va; “Awa ke ma resnenê keyeyanê şarê xo goreyê Labaratuwarê Weşîya Şarî ya Amedî û sewbîna yê labaratuwara ma, 2 labaratuwaran de yena kontrolkerdene. Kanalê awa şimitişî ra roj bi roj nimûneyî yenê girewtene û analîzî yenê kerdene. Awa ma ya şimitişî goreyê heme analîzan munasîb a. Ê xeberê ke çapemenî û medyaya komelkî ra gêrenê rast nîyê û biqestî yenê vilakerdene.

 ‘Labaratuwarê Weşîya Şarî kontrol kenê’

Şerîfogluyî îfade kerd ke heta nika analîz û kontrolê ke hem labaratuwaranê ma de hem zî yê Labaratuwaranê Weşîya Şarî de hetê kîmyasal û mîkroskobîkan ra çîyêko neyînî rastê ma nêameyo.

 ‘Awa ma de seba weşîya şarî tu tehtîdêk çin o’

Şerîfogluyî ard ziwan ke mîyanê şaristanî ra ekîbê ma roj bi roj kontrolê klorî zî kenê û wina dewam kerd; “Kontrolê ma yê klorî de heta nika ma rastê yew neyînîyêk nêameyî. Hewteyêkî de reyêk ma heme depoyanê xo ra nimûneyan gênê û kontrol kenê. Nê melumatî her hewte keyepelê ma de vila benê. Awa ma de qilêrîyêk yan nêweşîyêk çin ê.”

 ‘Depoyê awe 6 aşman de reyêk ganî bêrê pakkerdene’

Şerîfogluyî dîyar kerd ke bitaybetî sîteyan de depoyê awe 6 aşman de reyêk ganî bêrê pakkerdene û wina va; “Dibistane, nêweşxane ûsn awanî û sazgehî û apartman û sîteyî ke depoyê înan est ê, ganî 6 aşman de reyêk bêrê pakkerdene. Miqatekerdişê nê depoyanê şexsîyan û qilerî û nêweşîyê ke nê depoyan ra vila benê, berpirsîyarîya DÎSKÎ de nîya.”