Hemşaredarê Amedî yê Şaristanê Girdî Serra Bucak û Dogan Hatun beşdarê programê aşûreyî bîyî ke Komela Kulturî ya Pîr Sûltan Abdalî organîze kerdbî. Hemşaredare Bucak ard ziwan ke Cemxaneyî seba şarê elewîyan cayê îbadetî yo û va; “Ez hêvî kena ke cemxaneyî bibê wesîleyê aştî û aramî.”

Hemşaredarê Amedî yê Şaristanê Girdî Serra Bucak û Dogan Hatun beşdarê programê aşûreyî bîyî ke Komela Kulturî ya Pîr Sûltan Abdalî (PSAKD) organîze kerdbî. Hemşaredarê qezayan û endamê meclîsî zî beşdarê programî bîyî. Hemsereka komela PSAKD Ayfer Artan sipasîya her kesî kerd ke Rojeyê Matemî ra dima beşdarê nê programê aşûreyî bîyî.

Hemşaredare Bucak: Cîyavînayîş dewam keno

Hemşaredarê Amedî yê Şaristanê Girdî Serra Bucak îfade kerd ke bawerîya elewîyîye nîşanê aştî, weşî û aramî ya. Bucak wina dewam kerd; “Na cografyaya ke ma tede ciwîyenê, senî verê qirkerdiş û cîyavînayîşê elewîyan est bîyo, nika zî eynî cîyavînayîş dewam keno. La reyna zî sey ma însanî bîyî şahîd ke şarê elewîyan hertim hetê aştî û aramî de yo. Ma nê hetî ra bisiûd ê.”

 ‘Zanayîş, fehmkerdiş o’

Hemşaredare Bucak wina dewam kerd, “Rojeyê matemî 12 rojî yeno tepîştiş, la nê welatî de çend kesan zana ke no roje est o, çend kesan zana ke awe nêameya ê sifreyan ser o. Zanayîş fehmkerdiş o. Fehmkerdiş, paştîdayîş, weşvînayîş û temsîlkerdişê aştî yo.”

Hemşaredare dîyar kerd ke cemxaneyî seba elewîyan cayê îbadetî yo û hêvî kerd ke cemxaneyî bibê wesîleyê aştî, aramî û pîyabîyayîşî.

 ‘Ma do 23ê temmuze de çalakîya aşûreyî cîya-cîya cayan de virazê’

Hemşaredare ard ziwan ke ê do 23 temmuze roja sêşemeyî de hem qezayan de hem zî merkezê şaristanî ra çalakîyê aşûreyî do bêrê viraştene û do bi nê çalakîyan aştî û dostîya xo û elewîyan îfade bikê. Hemşaredare Bucak her kesî dawetê Koşuyolu, Berê Koyî, Nêweşxaneyê Gazî Yaşargîlî yê Cigêrayîş û Perwerdeyî û Nêweşxaneyê Selahattîn Eyyubî yê Dewlete kerd ke do çalakîy uca de bibê.

Programî de beşdaran cemê xo kerd û dima aşûre ame vilakerdene.