Şaredarîya Şaristanê Girdî, Şaredarîya Baglarî, Şaredarîya Kayapinarî, Şaredarîya Sûrî û Şaredarîya Yenîşehîrî turnuvayêka sporî organîze kerd.

Şaredarîyanê Şaristanê Girdî, Baglar, Yenîşehîr, Sûr û Kayapinarî seba ke vernîya sporî akerê, turnuvaya sporî organîze kerd. Turnuvaya ke endamê meclîsî yê cinîyan taximê voleybolî de ca gênê û yê lajekan zî futbolî de ca gênê, Qezaya Kayapinarî de Kompleksê 500 Evlerî de dest pêkerd.

Turnuvaya ke Hemşaredarê Kayapinarî Berîvan Gulşen Sîncar û Cengîz Dundar, Hemşaredarê Yenîşehîrî Safîye Akdag û Mehmet Ergun, Hemşaredarê Sûrî Fatma Gulan Onkol û Adnan Orhan beşdar bîyî, taximê voleybolî de yê Şaredarîya Şaristanê Girdî û yê Sûrî yewbînan reyde kay kerd. Bi serkewtişê taximê Şaredarîya Şaristanê Girdî qedîya. Taximê futbolî de zî yê Yenîşehîr û Kayapinarî kay kerd û bi serkewtişê kayapinarî maç qedîya.

Turnuvaya ke 5 rojî do dewam bika, taximanê serkewtîyan rê kupa yena dayene.