Şaredarîya Amedî ya Şaristanê Girdî seba ke şarê ma biweşî û bikonfor cuya xo dewam biko, mîyanê şaristanî de 6 cayan de bi perwerdekaran programê “Sporê Serê Sibayî” dana destpêkerdene.

Serekîya Daîreya Xîzmetê Ciwan û Sporî seba ke şar hîna dînç û xoser dest bi roje bikero û hîna biweşîye biciwîyo programê “Sporê Serê Sibayî” bi perwerderanê profesyonelan; Kent Meydani, Parka Tema, Parka 75, Parka Anit, Parka Koşuyolu û Parkorman de da destpêkerdene.

Her ca de yew cinî yew zî camêrd di perwerdekarî şarî rê perwerdeyê sporî danê û no program do 12 aşmî dewam biko. Mîyanê hewteyî mabênê saetanê 06.00 û 11.30î de program dewam keno. Bi taybetî kesê ke mabênê serranê 35-55î beşdar benê.

Taxanê dezavantajinan de dest pêkeno

Wekîlê Serekîya Daîreya Xîzmetê Ciwan û Sporî Çetîn Hasgumuş dîyar kerd ke çend rojan ra dima program taxanê dezavantajinan de zî dest pêkeno. Hasgumuşî wina va; “2014î ra yo ke nê xebatî dest pêkerdbî, demanê vîyareteyan de nê xebatê çend lengayî zî 1ê temmuze ra yo ke reyna destpêkerdo.”

Bi paştîdayîşê hemşaredaran faalîyetî bîyî vêşî

Hasgumuşî zî ard ziwan ke sporê serê sibayî seba weşîya merdiman zaf muhîm o û wina va; “Bi paştîdayîş û teşvîkkerdişê hemşaredaranê ma Serra Bucak û Dogan Hatunî, program û faalîyetê ma yê sporî bîyî vêşî.”

‘Hetê ruhî û bedenî ra ma rehet benê’

Roza Bagcaya ke demêko derg o ke Parka Anitî de sporê xo kena wina va; “bi perwerdekaranê ma ma tîya de egzersîzê xo kenê. Tîya de ma bi embazanê xo wextêkê weş vîyarnanê. Hem hetê ruhî ra hem zî bedenî ra ma rehet benê.”