Şaredarîya Amedî ya Şaristanê Girdî, seba ke şar bieşkîyo xidayê biweşî û pakî biwero, Koordînasyonê Kontrolê Xidayan awan kerd û badê perwerdeyê teorîkî 13 qezayanê de 300 kargehî kontrol kerdî û perwerdeyê serê karî organîze kerdî.

Yewîneya Xidayan yê Serekîya Daîreya Karê Weşîye şaredarîyanê qezayan reyde pîya Koordînasyonê Kontrolê Xidayan perwerdeyê xo yê teorîkî qedêna û qezayan de kontrolanê xo dewam keno. ekîban 13 qezayan de 300 tesîsê xidayan de kontrolê kerd û bi hewayêko pratîk yewîneyê qezayan perwerde kerdî.

 ‘Hedefê o yo ke şar bieşkîyo xo biresno xidayanê biweşîye’

Serekê Daîreya Weşîye Abdulvahap Saçakli îzah kerd ke heqê şarî yo bingeyin o ke bieşkîyo xo biresno xidayanê biweşîye û wina dewam kerd “Seba ke şarê ma bieşkîyo xo biresno xidayanê biweşîye 4 qezayanê merkezî û 13 qezayanê bînan de ma koordînasyonê weşîye awan kerd. Ekîbê ma xebitênê ke vernîya xidayanê vîyarteyan bigîrê ke weşîya şarê ma tehtîd kenê. Verê, ma seba perwerdeyî kom bîyî. Kombîyayîşî ra dima embazê ma yê ke bitecrûbe yê, qezayan ra perwerdeyê pratîk da embazanê ma.

 '300 tesîsan de seba perwerdeyî kontrolî ameyî kerdene’

Saçakliyî va ke na xebate reya yewin a bena û wina dewam kerd; "13 qezayanê ma de serê karî de perwerdeyê kontrolî ameyî dayene. Destpêk de 300 dikanî ameyî kontrolkerdene. Ma wazenê ke hûmarê nînan zêde bikê."

Pakîye de tavîz çin o

Saçakliyî îfade kerd ke înan hîşyarîyê ciddî dayê esnafan û qiseykerdişê xo wina dewam kerd: "Wexto ke ma şonê hetê înan, ma hîşyarîyê ciddî danê esnafan. Ma wazenê ke qetî na babete de zaf dîqet bikerê. Çunke eke hîjyen û pakîye çin bo xidayê biweşîye zî çin ê."

Heta peynîya serre 8 hezar tesîsê bajarî do bêrê kontrol kerdene

Ekîban ke 4 aşmanê peyênan de zêdeyê 4 hezar tesîsî kontrol kerdî û hîşyarîyê lazimî dayî, heta peynîya serre 8 hezar tesîsî do kontrol bikerê û derheqê weşîya xida û hîjyenî de kêmanîyan zaf tay bikerê û yew hişmendîya pêroyî awan bikerê.