Mudirîya Pêroyî ya DÎSKÎ ya Şaredarîya Şaristanê Girdî ya Amedî, rayîrê Rihayî de Pirdê Çatrayîrî yê Nêweşxaneyê Cinî û Bîyayîşî de ke varişanê zêdeyan de awe kom bena, tede 70% xebatê binawanî qedênayî.

Mudirîya Pêroyî ya Îdareyê Awe û Kanalîzasyonê Amedî (DÎSKÎ), şaristanî de xebatanê newekerdişê binawanîyan dewam kena. Mudirîya Pêroyî ya DÎSKÎ, seba ke awe û laserî ke sebebê varişanê xurt û yewrayeyan vejîyenê, zerar nêdê, şebekeyê awa varanî bedilnena kena borîyê kolektorê girdî.

Ekîbê ke Baglar de Caddeyê Evrîm Alataşî de xebate qedênaya, Bulwarê Mahabadî de xebatanê xo dewam kenê.

Hetê bînî ra, Caddeyê Evrîm Alataşî de ke xebatî qedîyayê, ekîbê ke girêdayeyê Serekîya Daîreya Koordînasyonê Viraştiş û Pawîtişê Rayîr û Binawanîyan ê, xebatanê asfaltî kenê.

Xetê awa varanî de xebata baypasî 

Seba ke vernîya awa ke varanê zêdeyan de Bulvarê Mahabadî û Çatrayîrê Nazim Hikmetî de kom bena, bêro girewtiş, mabênê rayîrê Rihayî û Çatrayîrê Nazim Hikmetî de 4 xetê baypasinî yê awa varanî do virazîyê. Bi naye, awa ke na mintiqa de bena kom do bêro vilakerdiş.

Xetê baypasinî yê awa varanî de, 1.713 metre borîyê betonarme, 34 bacayê kontrolî, 135 kanalê awa varanî û 34 qapaxê pîk ê sferoyanan do bêrê şuxulnayîş.

'Ma do vernîya awa ke kom bena, bigîrê'

Mudirê Pêroyî yê DÎSKÎ Mehmet Şerîfogluyî va ke xebatê binawanî ke Baglar de Caddeyê Evrîm Alataşî ra dest pêkenê û heta rayîrê Rihayî resenê, seba şaristanî muhîm ê. Şerîfogluyî wina va: "Ma zî tesîrê vurîyayîşê îklîmê globalî, sey heme şaristananê ma cuyenê. Varayîşê xurt û yewreyî, tesîrê ey o tewr eşkera yo. Ma 70%ê xebata xo qedênaya. Gama ke xebate qedîya, ma do vernîya awa ke sebebê varayîşanê xurt û yewreyan ke Pirdê Çatrayîrî yê Nêweşxaneyê Cinî û Bîyayîşî ke rayîrê Rihayî de kom bena, bigîrê."