550 wendekarî kursanê hunerî yê bêpereyî ra ke Şaredarîya Amedî ya Şaristanê Girdî şubeyanê hunerî yê cîya-cîyayan de akerdê, îstîfade kenê û îmkanê xoaverşîyayîşî vînenê.

Serekîya Daîreya Karê Kulturî û Sosyalî seba ke bala gede û pîlan bianco hunerî ser, kursê hunerî yê demserra hamnanî dayê destpêkerdiş û şarî eleqeyêko gird mojnayo. Merkezê Kultur û Kongre de kursê hobî, qabilîyet û resimî seba gedeyan yenê dayene û tede gîtar, erbane, ziwanê îşaretan, govende, kemançe û perwerdeyê vengî yenê dayene. 550 wendekarî kursanê demserra hamnanî ra îstîfade kenê.

'Ez zaf memnun menda'

Kursîyeran ra Roza Cemîlogluyî va ke merkez hetkarîya wendekaran keno û wina qisey kerd: "Ez teqrîben yew aşm o ke yena kursê gîtarî. Ez tîya ra zaf memnun menda. Ma destpêkerdişî ra dest bi musayîşî kerd.. Ez sipasîya xo Şaredarîya Amedî ya Şaristanê Girdî rê kena."

Aram Murat Acarî ke kurs de resimviraştiş musayo, va: "Mi verê cû nêzanayêne resim viraza. Ez ameya tîya. Mi dest pêkerd zaf weş resim viraştî. Ez embazanê xo reyde zaf weş wext vîyarnena. Tewirê resimî yo ke ez tewr zaf ci ra hes kena karaqalem o. Mi yew finê yew resim viraştbî. Tede yew selike est bî û tede sayî est bîy. Mi o viraşt, mamostayî zî ey dêsî ro dard we."

'Aktîvîteyê weşî yenê viraştiş'

Kadir Taşkiranî ke Kursê Perwerdeyê Vengî de perwerde gêno, va: "Ma aşmanê hamnanî de embazanê xo reyde perwerdeyê vengî gênê, vengê xo aver benê û embazanê xo reyde cehdê vatiş û vatişê deyîran kenê. Aktîvîteyê weşî yenê viraştiş. Ma sipasîya xo Şaredarîya Amedî ya Şaristanê Girdî rê kenê ke na îmkan dayo ma."

Serpil Arslan ke va ez seba hobî ameya kurs, wina qisey kerd: "Ez kursê erbane de ya. Ez seba hobî ameya tîya. Mi dî ke qabilîyetê mi est ê, ez fikirîyaya ke ez do cayanê weşan biresa. Ez wazena aver şêra."

‘Hişmendîya ma virazîyaye'

Yeşim Ozpamukî ke wendekara Kursê Ziwanê Îşaretan a, va ke aye bi saya kursî ziwanê îşaretan musaya û hişmendîyêke tede virazîyaya û wina dewam kerd: "Mi perwerdeyê verdibistane wend û qedêna. Ez ameya Kursê Ziwanê Îşaretan. Çunke nê waran de xebatê cîya-cîyayî est ê, lazim o ke ma zî ziwanê îşaretan bimusê. Çunke ma dersanê entegrasyonî zî gênê. Wendekarê ma yê entegrasyonî zî est ê. Ma tîya dest pêkerd. Hişmendîya ma virazîyaye. Mesela wexto ke ez wenîştêne yew otobus, kesê ke bi ziwanê îşaretan qisey kenê, mi zaf ê meraq kerdêne. Nika mi dest pê kerd hîna zêde baldar bena. Ma ziwanê îşaretan televîzyon de zî vînenê. Ma zî cehdê fehmkerdişî kenê. No seba mi zaf weş bî. Sey terapî yo na derse. Ez zaf memnun a ke ez ameya."