Şaredarîya Amedî ya Şaristanê Girdî, seba ke erdê bêawî reyde awe bîyaro têhet û bi nê rayîrî piştî bido ziraat û heywandarîye, taxanê qezayanê teberî de 75 kîlometre kanalê awdayîşî yê akerde-girewteyî viraştî.

Serekîya Daîreya Xîzmetê Teberî, seba ke zîreat û heywandarîye aver bero, xebatanê xo dewam kena. Ekîbê ke girêdayeyê Serekîye yê, seba ke awe bi hawayêko berhemdayox bêro şuxulnayene û awe biresa erdanê bêawîyan, bajar de projeyan virazenê. Çarçewaya projeyan de ekîbê şaredarîya şaristanê girdî, taxanê qezayanê teberî de 75 kîlometre kanalê awdayîşî yê akerde-girewteyî viraştî.

9 qezayan de beşêkê projeyan o gird ame qedênayene

Projeyê ke qezayanê Çêrmûg-Çewlîg de dewam kenê, %71ê înan; qezayanê Hêni-Lîce-Pasûr de %84ê înan; qezayanê Karaz-Pîran-Erxenî-Hezro de zî %60ê înan ame qedênayene. Ekîbî, seba ke beşê projeyê ke mendî, bi lez bêrê qedênayene, xebatan dewam kenê.

Seba viraştişanê neweyan xebatê etudî ameyî kerdene

Qezaya Pasûrî de Taxa Çaglayan de gola Awa Şimitişê Heywanan(AŞH) a neweye, Taxa Narli de kanalê awdayîşî; Qezaya Çêrmûgî de Taxa Çalitepe de 2 hebî golê AŞH’yî; Qezaya Lîce de Taxa Yalaza de golê AŞH’yî û kanalê awdayîşî rê xebata etudî ameye kerdene.

Xebatê pawitiş û tamîrkerdişî yê kanal û golanê ke est ê

Qezaya Sûrî de Buyukkadî, Qezaya Lîce de Yalaza, Qezaya Pasûrî de Îslamkoy (mezraya Axdatî), Qezaya Hezro de Koçbaba û Karpuzlu, Qezaya Baglarî de Ovundulere, Qezaya Kayapinarî de Kirkpinar, Qezaya Çêrmûgî de Akçaorten û Orenkuyu de gole û borîyê awdayîşê ziraetî de xebata pawitiş û tamîrkerdişî ameye kerdene.

'Amacê ma o yo ke ma ekonomîya herêmkî xurt bikê

Serekê Daîreya Xizmetê Teberî Velat Ozerî dîyar kerd ke ê şaristanî de xîzmet kenê û wina va: "Sey Serekîya Daîreya Xizmetê Teberî amacê ma o yo ke ekonomîya herêmkî xurt bikerê û seba nê amacî ma wazenê ke berhemdarîya ke ma hedef kerda, taxanê teberî de teşwîq bikê. Seba ke ma zîreat û heywandarîye de hîna xurt bikê, ganî ma çimeyê xo yê awe bi hawayêko raşt bişuxulnê. Ma bi projeyê ke ma virazenê, seba ke erdan bikê hîna berhemdayoxê ziraetî û vernîya vindîbîyayîşê awe bigîrê, sîstemê awdayîşî yê girewteyî-akerdeyî virazenê."

'Ekîbê Şaredarîya Şaristanê Girdî hefteyêk o tîya de xebitîyenê'

Haci Lokman Doganî ke Taxa Sekî ya Bismîlî ra yo, keyweşîya xo ya xebate îfade kerd û va: "Ma teqrîben 35 serrî yo ke na gole ra îstîfade kenê. Çi heyf ke zelzele de bendê na gola ma xirabe bî. Di serrî yo ke ma nêeşkenê tîya ra îstîfade bikê. Wextê ci de ma heme cehdê xo kerdî, ma nêeşkayî kesî ra xîzmet bigîrê. Şaredarîya Şaristanê Girdî ke nika est a, hefteyêk o tîya de xebate kena."