Mudirîya Pêroyî ya DÎSKÎ ya Şaredarîya Amedî ya Şaristanê Girdî, Tesîsê Pakkerdişê Awa Lêmine ya Bîyolojîke de xebata newekerdişî dest pêkerd.

Mudirîya Pêroyî ya DÎSKÎ (Îdareya Awe û Kanalîzasyonî ya Amedî), seba tesîsê ke serra 2004î de sey Tesîsê Pakkerdişê Awa Lêmine ya Amedî ameyo awankerdene la serra 2015 ra nat sey Tesîsê Pakkerdişê Awa Lêmine ya Bîyolojke xîzmet keno, yew projeya newekerdişî hazir kerd.

Tesîs ke vernîya lêminbîyayîşê Çemê Dîcle gêno ke çimeyê awe yo tewr gird ê herême yo û weşîya şarî paweno, debîyê dizaynê awa lêmine yê tesîsî roje de 175 hezar metrekup o. Tesîsî de bi xeta kolektorî ya 2000 mîlîmetreyî û pompayê burguyî yê îstasyonê pompaysnê kewtişê awa lêmine, serra 2004 ra nat awe 7.3 metre yena terfîkerdene.

Deformeyî bîyî

Tesîsî de, grûba çerxine ya redukterî ke pompayê burguyî de ya, bi demî deformeyê cî vejîyayî û şikîyayî. Na rewşe bî sebeb ke pompayî nêeşkê bi berhemdayîş bixebitîyê û kapasîteyê girewtişê awa tesîsî kêm bibo.

Bedelo texmînî 95 mîlyonî yo

Seba naye Mudirîya Pêroyî ya DÎSKÎ ke Tesîsê Pakkerdişê Awa Lêmine ya Bîyolojîke yê Amedî rê xebate daye destpêkerdene, bi nameyê "Karê Viraştişê Awankerdişê Awanîyê Kewtişî yê Tesîsê Pakkerdişê Awa Lêmine yê Merkezî" yew projeya newekerdişî hazir kerd. Bi bedela 94 mîlyon 751 hezar 750 TL îhaleyê proje aşma Hezîrane de ame kerdene û şîrketa muteahidî reyde peyman ame îmzakerdene.

Xebatan dest pêkerd

Şîrketa muteahidî, Tesîsê Pakkerdişê Awa Lêmine ya Bîyolojîke yê Amedî de xebatanê newekerdişî dayî destpêkerdene.

Çarçewaya projeya newekerdişî de pompayê burguyî do bêrê wedaritene û tesîsî rê girewtoxê kerrayan, izgara û îstasyonê têrfîyê neweyî do bêrê viraştene. Bi projeyî, tesîsî de 5 îstasyonê pompayê tîpê binerdî do bêrê ronayene.

Temmuzs 2025î de do bêro qedênayene

Hedef o yo ke xebatê newekerdişî yê Tesîsê Pakkerdişê Awa Lêmine ya Bîyolojîke yê Amedî heta Temmuza 2025 bêrê qedênayene.

Heta serra 2040î problemê awa lêmine çin o

Bi saya xebatanê newekerdişî ke Tesîsê Pakkerdişê Awa Lêmine ya Bîyolojîke de yenê kerdene, merkezê Amedî de heta serra 2040î problemê awa lêmine do nêbo.