Hemşaredarê Şaredarîya Amedî ya Şaristanê Girdî Serra Bucak û Dogan Hatun, beşdarê zîyafetê Amedsporî bîy û hêvî kerd ke spor, Amed de, herême de û welatî de bibo sebebê dostanîye, pîyabîyayîşî û aştî.

Hemşaredarê Şaredarîya Şaristanê Girdî Serra Bucak û Dogan Hatun, Serekê Federasyonê Futbolî yê Tirkîya (TFF) Îbrahîm Haciosmanoglu û endamê heyetê îdareyî, Walîyê Amedî Murat Zorluoglu, Serekê Kulubê Amedsporî Azîz Elaldi, Mudirê Emnîyetê Amedî Fatih Kaya û temsilkarê dezgeyanê komelkîyan beşdarê zîyafetê galayî bîy ke Amedsporî qezaya Sûrî de Konaxê Cemîl Paşayî de organîze kerdbî.

Hemşaredare Bucak: Ma do pîya çareserî peyda bikê

Hemşaredare Bucak ke zîyafetî de qisey kerd û dîyar kerd ke ê sey Hemşaredarê Şaredarîya Amedî ya Şaristanê Girdî û endamê meclîsî, seba problemê serekeyanê nê bajarî û çareserîyanê înan zaf rey dezgeyanê komelkîyan, odayanê meslekan, kulubê sporan û komela Amedsporî reyde munaqeşe kerd û ê do pîya çareserî virazê.

'Ma do kompleksê sporan virazê'

Bucak îfade kerd ke doman û ciwanan rê yew ameyox lazim o û wina dewam kerd: "Viraştişê ameyoxî, viraştişê ewroyî ra vîyareno. Ma ke viraştişê ewroyî senî bingeyêko raşt ser o ronê, ma şenê pîya viraştişê ameyoxî zî eynî bingeyî ser o biramê. Ciwan û domanê nê bajarî her wextî ra vêşêr hewcedarê ney ê. Ma îlan kerd ke ma do tena seba futbolî nê, seba ke heme beşê sporan bajarê xo de aver şêrê, eynî wext de seba ke futbolê cinîyan aver şêro, seba ke cinî biresê heme cayê sporan ma do bajarî mîyan de kompleksê sporan, merkezê sporanê profesyonelan û amatoran virazê."

'Projeyî do Planê Stratejîkî de bibê'

Bucak bale ante Planê Stratejîkî ser o ke aşma êlule de Meclîsî ra vîyareno û dîyar kerd ke Amedijî û sporhesî do hem projeyê nê xebatan hem detayanê înan û hem zî butçeya înan ke aşma teşrîna verêne de meclîsî de yena qebulkerdene, bivînê.

'Wa spor bibo sebebê aştî'

Bucak hêvî kerd ke spor Amed de, hêreme û welatî de bibo sebebê dostanîye, pîyabîyayîşî û aştî û wina va: "Ma naye, her wextî ra vêşêr wazenê. Çunke eke ma viraştişê ewroyî hetê ciwananê xo û domananê xo ra raşt nêvirazê, ma nêşênê ameyoxî zî raşt biramê û dewam bikê. La ma pawitişê yew ameyoxê dewamkerdeyî, yew bajarê dewamkerdeyî û yew komelê dewamkerdeyî kenê.

'Amed, Amedsporî rê wayîr vejîyeno'

Bucak îşaret kerd ke Amedsporî de yew tarîxo zaf muhîm est o, serekê kulubî, antrenorî, hemşaredarî û her kesî rê ke prosesê tarîxî yê Amedsporî de ke bi vurîyayîşê nameyî ameyo ewro kede daya, sipas kerd. Bucak qeyd kerd ke şampîyonîya ke emser ameya girewtene zaf muhîm a û wina dewam kerd: "Amed hîna biqewet Amedsporî rê wayîr vejîyeno. Berpirsîyarîya ke kewena ma rayberîya herême û weçîneyeyan ser o, Amedsporê ma ke bajar û komel pê wayîr vejîyeno, ma zî heta peynî piştî bidê û cehd bikê ke bireso lîgo corên.

Hemşaredare Bucak, behsê serebûdanê Amedsporî kerd

Bucak ke ard vîrê şarî ke Amedsporî rayîrêkê zehmetî ra vîyarto û resayo ewro û wina dewam kerd: "Serranê vîyarteyan de bitaybetî maçanê ke teber ra kay kerd, uca de rastê tayê sîyasetanê teberkerdiş û cîyakerdişî ameybî. Ma hêvî kenê ke ma reyna qet nê menzereyan nêvînê. Çunke Amedsporî zî sey Amedî yew bajarêko pêgirewtox o û bi fehmkerdox û demokrasî bîyo nimûne û heskerdoxîya xo, karakterê xo yo aştîhes û dosthes û fehmkerdoxîya xo zaf nîşanê heme ekîbanê futbolî dayo ke tîya de ameyî mêmandarîkerdene. Ez hêvî kena ke ma pîya şênê rayîran awan bikerê ke tede yewbînteberkerdiş û cîyakerdiş çin bo û heme beşanê sporan de pêbîyayîş, pîyabîyayîş û pîya girdkerdişê nê bajarî û nê welatî bi hawayêko demokratîk bibo."

Bucak dîyar kerd ke seba maçê Îstanbulsporî paweyê serkewtiş ê.

Zîyafetî de, Serekê TFF’î Haciosmanoglu, Walîyê Amedî Zorluoglu, Serekê Kulubê Amedsporî Elaldi û Serekê Odaya Tîcaret û Sanayî ya Amedî (DTSO) Mehmet Kaya zî qisey kerd.

Hemşaredaran rê formayî ameyî dîyarîkerdene

Badê qiseykerdişan, Serekê Kulubê Amedsporî Elaldi û Serekê TFFî Haciosmanoglu, Hemşaredar Bucak û Hatunî rê formayê Amedspor û yê taximê mîllî yê Tirkîya ke ser o name û numreyê 21î bî, dîyarî kerdî.