Şaredarîya Amedî ya Şaristanê Girdî, seba ke problemê cayê mendişî yê wendekaranê unîversîteyî çareser bikero û hetkarî bido prosesê perwerdeyî, wargehê wendekaranê kênekan reyna akeno.

Şaredarîya Şaristanê Girdî, çarçewaya projeya şaredarîya sosyalî de seba çareserkerdişê problemê cayê mendişî yê wendekaranê kênekan ke seba perwerdeyê unîversîteyî teber ra yenê bajar, dest bi xebate kerd.

Bi kapasîteyê 391 kesan

Serekîya Daîreya Xizmetê Sosyalî, wargehê wendekaranê kênayan ke kapasîteyê ci 136 oda û 391 cilan o, 2016 de Hemşaredare Gultan Kişanak û Firat Anlî hetî ra ameybî akerdene û qeyyuman o vurîyaybî, reyna akeno.

Wargehê Wendekaranê Kênekan ke 8 qatî yo, tede salona werdî, kitabxane, odaya kompîturî, kantîn, odaya wendişî, odayê utu, cayê şutişê cilan, odaya zîyaretkeran, mitbax, revîr, odaya muşahedeyî, buroyê îdarî, buroyê personelan, terzî, depoyê mitbaxî, odaya pakîye û teras zî ca gênê.

Serra perwerdeyî 2024-2025 de do dest bi xîzmetî bikero

Wargeho ke goreyê hewcedarîya wendekaran ameyo plankerdiş, bitaybetî domanê keyeyanê ke ameyeyê înan kêmî yo, do ey ra îstîfade bikerê. Wargeh, serra perwerdeyî 2024-2025 de do dest bi xizmetdayîşê wendekaran bikero.

Muracatî onlaynî dest pêkerd

Wargeho ke adresa Taxa Yenîşehîr, Kuça Yildiz, Numre: 2345 de xizmet dano, muracatê ey do linkê https://yurt.diyarbakir.bel.tr/ ser o onlayn bêro kerdene.

Mêmanxaneya Nêweşan û Merezedaranê Înan do cayêko newe de xizmet bido

Seba nêweş û merdimanê înan ke nika binaya ke bena wargehê kênayan de manenê, do yewna bina de xizmet bêro dayene. Wexto ke cayo ke beno Mêmanxaneya Nêweşan Înan hazir bo, nêweşî û merdimê înan do bi hawayêko ke zirar nêvînenê bêrê neqlkerdene.