Şaredarîya Amedî ya Şaristanê Girdî, Baxçeyê Miletî yê Yenîşehîrî de ke hetê Wezaretê Derûdor, Bajarwanî û Vurîyayîşê Îklîmî ra bi TOKÎyî dayîyayo viraştene û dewrê şaredarî bîyo la qebulo qetî nêbîyo, xebatê pakî û pawitişî kena.

Serekîya Daîreya Park û Baxçeyan, seba ke şar bêproblem bieşkîyo parkan ra îstîfade bikero, cayanê keskayîyan de xebatanê pawitiş û tamîrkerdişî dewam kena. Ekîbî, Baxçeyê Miletî yê qezaya Yenîşehîrî de ke kêmanîyan reyde Şaredarîya Şaristanê Girdî rê ameyo devrkerdiş la qebulo qetî nêbîyo, bêvindertene xebatanê pakî, pawitiş û tamîrkerdişî kenê.

'Ma kêmanîyî şîrketa peymanviraşta rê îlan kerdî'

Serekê Yewîneya Pawitiş û Tamîrkerdişî ke girêdayeyê Serekîya Daîreya Park û Baxçeyan a, Sînan Bîçerî, derheqê prosesê devrkerdişê Baxçeyê Miletî de melumatî dayî. Bîçerî va ke Nîsana 2023î de Baxçeyê Miletî bi kêmanîyan înan rê ame devrkerdiş la qebulo qetî nêbî. Bîçerî wina dewam kerd: "Ma sey Serekîya Daîreya Park û Baxçeyan a Şaredarîya Şaristanê Girdî komîsyonêk viraşt, embazanê xo reyde ma tîya de kontrolê lazimî kerdî û ma kêmanî vatî û beyano nuştekî da. Ma kêmanîyê parke şîrkete rê îlan kerdî û waşt ke ê nê kêmanîyan temam bikerê. Nê panc aşman de çend kêmasîyî temam kerdî. Sewbîna qet xebatêke nêbîye. Aşma Gulane ya vîyarte de TOKÎyî ra heyet ame Amed. Ma zî nê heyetî reyde heme parke ra fetilyayî. Ma va hetanî ke kêmanî nêrê temamkerdene, ma sey Şaredarîya Şaristanê Girdî tîya nêgênê. Ma 50 rojî mudet da heyetî. Nê 50 rojan de çi heyf ke yew mêx zî nêame pirodayene."

'Xebatê ma dewam kenê'

Bîçerî ke derheqê xebatanê Baxçeyê Miletî yê Yenîşehîrî de qisey kerd, wina va: "Ma sey Şaredarîya Şaristanê Girdî nê prosesî de seba ke şarê ma rehet bibo, ma xebatê xo yê derheqê cayanê keskayîyan de ke tehluke virazenê, dewam kerdî. Ma seba ke şarê ma rehet bibo, her çî ke ma dest ra yeno, ma kerd. Çi heyf ke hema zî ma nêeşkayî çîyêk TOKÎ ra bigîrê. Xebatê ma dewam kenê. Xora Baxçeyê Miletî yê Yenîşehîrî parka ma ya ke cayêko muhîm de ameyo viraştene. Ma sey Şaredarîya Şaristanê Girdî seba ke şarê ma cayêko hîna rehet û emnîyetin de bimano, her çî ke ma dest ra yeno ma do bikerê û ma do dewam bikerê."

'Ma tim saha ra yê'

Bîçerî ke dîyar kerd Şaredarîya Şaristanê Girdî berpirsîyarîya xo ana ca, wina qisey kerd: "Xebatê ma yê pakî, awedayîş û pakkerdişê vaşê xerîbî yê cayanê keskayîyan de binîzam dewam kenê. Ma bank û sitilê çopî newe kerdî. Problemê ke cayanê kaykerdişî û têlan de vejîyenê, ma çareser kenê. Ma tim saha ra yê. Xebatê ma yê Baxçeyê Miletî yê Yenîşehîrî tim dewam kenê."