Hemşaredarê Şaredarîya Amedî ya Şaristanê Girdî Serra Bucak û Dogan Hatunî, seba pawitişê xozaya nêwalê Dîcle, kargehanê ke uca de yê, kontrol kerdî û qeyd kerd ke do waranê mîrasê dinya yê UNESCO'yî bipawê.

Hemşaredarê Şaredarîya Şaristanê Girdî Serra Bucak û Dogan Hatunî, seba pawitişê xozaya Nêwalê Dîcle û vernîgirewtişê awanîyanê neweyan kontrolanê xo dewam kenê. Hemşaredarî ke Pirdê Kabî ra dest pêkerd û kenarê Royê Dîcle de awanîyê bêdestûrî û qaçaxî kontrol kerdî, dima şîyî qismê corênî yê Pirdê Des Çimeyî yê tarîxî ke Girê Çewressîwaran de yo. Hemşaredarî ke tîya de zî serekê daîreyanê eleqedaran reyde kontrolî kerdî, seba pawitişê xozaya nêwalê Dîcle, pawitişê pakîya derûdorî û vernîgirewtişê awanîyanê neweyan xebatê ke eşkenê bêrê kerdene, înan ser o qisey kerd.

'Ganî seba newalê dîcleyî ekîbêko pawitişî bêro awankerdene'

Hemşaredaran dîyar kerd ke seba pawitişê Newalê Dîcleyî ganî ekîbêko xisusî bêro awankerdene û waşt ke hetê beşanê eleqedaran ra xebata fîzîbîlîteyî bêro kerdene seba ke cayê sosyalî yê pakî bêrê viraştene ke tede şar bieşko bêzirardayîşê ekosîstemî xoza reyde têkildar bibo.

'Ganî her kes berpirsîyarîya xo bîyaro ca'

Hemşaredaran qeyd kerd do wareyê mîrasê dinya yê UNESCO'yî bipawê û va ke seba bajarêko hîna ekolojîk do heme hemparanê bajarî reyde têkilîya muşterek bêro kerdene û her kesê ke xo berpirsîyar hîs keno dawet kerdî ke hîna zaf baldar bibê.

Kontrolan de Hemşaredaran reyde Hetkarê Sekreterê Pêroyî Reşat Bakan û serekê daîreyanê eleqedaran pîya bî.