Hemşaredarê Şaredarîya Amedî ya Şaristanê Girdî Serra Bucak û Dogan Hatunî, akerdişê Aşxaneyê Şarî kerd.

Aşxaneyê Şarî ke Şaredarîya Şaristanê Girdî seba ke şarê bajarî rê werdê erjan, pak, weş û bawerpêkerdeyî pêşkêş biko abî û dest bi xizmetî kerd. Aşxaneyê Şarî ke do bêyê roja yewşemeyî her roje saete 12.00-17.00 de xizmet bido, tede do 4 tewir werdî bi 70 TL bêrê dayene. Aşxaneyê Şarî ke bi taybetî seba şarê kêmameyeyî û wendekaran ame fikirîyayene, do rojane hezar kesan rê xizmet bido.

Programê akerdişî

Akerdişê Aşxaneyê Şarî ke Kûçeyê Hunerî yê Qezaya Yenîşehîrî de ameyo akerdene, tede Hemşaredarê Şaredarîya Amedî ya Şaristanê Girdî Serra Bucak û Dogan Hatun, Parlamentera Partîya DEM’î Adalet Kaya, hemşaredarê şaredarîyanê qezayanê Kayapinar û Yenîşehîrî, hemserekê bajarî yê Partîya DEM û Partîya Herêmanê Demokratîkan (DBP), Sekretero Pêroyî yê Şaredarîya Şaristanê Girdî Emrullah Gorduk, Hetkarê Sekreterê Pêroyî Zerrîn Turk, Reşat Bakan, Ozgur Yildiz û Ezîz Ozdogan û endamê meclîsî, serekê daîreyan û şar beşdar bîy.

Hemşaredare Bucak: Gama verêne seba resayîşê werdê weşî

Hemşaredare Serra Bucak, qiseykerdişê xo yê akerdişî de va ke înan 31ê Adare ra nat bi tempoyêko zaf leze xebatê xizmetanê bajarî kerdê. Hemşaredare Bucak wina dewam kerd: "Ma hêvî kenê, seba şar û esnafanê Ofîsî xeyrên bo. Gama yewin a, ma şênê dewamê aye bîyarê. Xebatê ma yê nê wareyî do dewam bikerê. Feqîrîye, zehmetîya debara rojane est a, seba ke ma naye derbas bikerê û biresê werdê weşî na gama verêne bîye."

Hemşaredar Hatun: Ganî resayîşê werdê erjanî bêro temînkerdene

Hemşaredar Dogan Hatunî zî va ke înan 31ê Adare ra nat şaredarîyanê ke qeyyûman ra girewtê, tede vera gelek probleman mucadele kerdo. Hatunî va "Ma xebatanê xo yê ke ihtîyacanê şarê ma rê yê, înan zî dewam kenê" û qiseykerdişê xo wina qedêna: "Şima zanê ke krîzêko ekonomîk est o. Zaf kesî nêşênê pîzeyê xo mird bikerê, keyeyê xo de nêşênê werd virazê. Ganî sey nê Aşxaneyê Şarî ke ma akerd, resayîşê werdê hem weşî hem zî erjanî bêro temînkerdene. Heta ke yew kes zî keye de vêşan nêmano, ma do xebatanê xo dewam bikerê."

Aşxaneyê Şarî abî

Badê qiseykerdişan Hemşaredaran Bucak û Hatun, beşdaran reyde qûrdelaya akerdişî birnaye. Hemşaredaran ke şarî rê werd vila kerd, dima şarî reyde Aşxaneyê Şarî de şamîa werd.