Şaredarîya Amedî ya Şaristanê Girdî, seba karkeranê ke Serekîya Daîreya Zabita de xebitîyenê, semînerê cinsîyetê komelkî da.

Serekîya Daîreya Xizmetanê Cinî û Keyeyî, seba Hewteyê Zabiteyan semînerêk derheqê Seypêyîya/Neseypêyîya Cinsîyetê Komelkî de organîze kerd. Semîner ke Salona Konferansî ya Elî Emîrî de virazîya, tede derheqê "Seypêyîya/Neseypêyîya Cinsîyetê Komelkî", "Cinsîyetê Bîyolojîk-Cinsîyetê Komelkî", "Rolê Cinsîyetê Komelkî" û "Seba Seypêyîya Cinsîyetî Çi Eşkeno Bêro Kerdene" de munaqeşeyî ameyî kerdene.

Pêşkêşî ke semîner de ame kerdene, tede ame îşaretkerdene ke cinsîyetê komelkî, kulturanê cîya-cîyayan de, dem û cayê cîya-cîyayanê tarîxî de rol û berpirsîyarîyê cîya-cîyayî ke komel dano cinî û camêrdan. Pêşkêşî de ame tekîdkerdene ke cinsîyetê komelkî ke heme komelan de hetê sîstemanê pederşayî ra bi qanûnan, edet û toreyan yeno pawitene û newe ra yeno viraştene, merdiman keno eynî, kesê ke cîya yê, teber keno û ceza dano û bi no hawa beno sebebê cîyakerdişî.

'Vurîyayîş ma ra dest pêkeno

Pêşkêşî de ame îşaretkerdene ke seba temînkerdişê seypêyîya cinsîyetê komelkî çi eşkeno bêro kerdene û wina ame vatene: "Helwestê seypêyî yê fikir û tewirê ma, hem karê ma de hem zî têkilîyanê ma yê kesanê dorûverê ma de tesîrêko pozitîf virazeno. Bi beşdarbîyayîşê na xebate ke ma organîze kerda, şima seba temînkerdişê seypêyîya cinsîyetê komelkî gamêka muhîm eşte. Elbete seba temînkerdişê seypêyîye hewceyîya vurîyayîşanê seranserê welatî est a. La vurîyayîş zî ma ra dest pêkeno. Ganî ma keye de, cayê karî de, kuçe ra dîqet bikerê ke ma bêheqîye nêkerê. Ganî ma seba seypêyîya cinsîyetî verê cû xo ra dest pêbikerê yanî fikir xo û waştişanê xo ra newe ra biewnîyê. Wina ma eşkenê dest bi vurînayîşê komelî bikerê."

Serekîya Daîreya Xizmetanê Cinî û Keyeyî, do dewam bikero ke karkeranê şaredarîye rê perwerdeyê cinsîyetê komelkî bido.