Koordînasyonê Kontrolê Weşîye ke bi pêşengîya Şaredarîya Amedî ya Şaristanê Girdî ameyo awankerdene, Herêma Pîşesazîya Organîzeya Besî ya Girêdayeya Ziraetî de seba ke derûdor pak bêro pawitene û weşîya şarî bêro pawitene, îqazê ke kargehan rê kerdbî, nika reyna kontrol kerd ke ka goş nanê nê îqazan yan ney.

Koordînasyonê Kontrolê Weşîye ke bi pêşengîya Serekîya Daîreya Weşîye ameyo awankerdene û tede Serekîya Daîreya Zabiteyan, Serekîya Daîreya Kontrol û Pawitişê Derûdorî, Mudirîya Pêroyî ya Îdareya Awa Amedî û Kanalîzasyonî (DÎSKÎ), Mudirîya Weşîye ya Bajarî, Mudirîya Bajarî ya Derûdor, Şaristanî û Vurîyayîşê Hewayî û Mudirîya Ziraetî ya Bajarî est ê, xebatanê xo dewam keno.

Ekîbî ke kontrolê xo Taxa Ovunduleri ya girêdayeya Qezaya Baglarî de Herêma Pîşesazîya Organîzeya Besî ya Girêdayeya Ziraetî de kerdî, kargehan de kontrolê mutabiqîya mewzuatî kerd û îqazê lazimî kerdî. OSBya Besî ya Girêdayeya Ziraetî û kargehê ke derûdorî lêmin kenê û mewzuatî ra nêbenê mutabiq, înan rê prosesê qanûnî ameyî tetbîqkerdene.

'Ma kontrol kerd ka goş nanê îqazan yan ney'

Amîrê Şawitiş û Îdareyî yê Beşê Dermanî yê Serekîya Daîreya Weşîye Bulent Gungormûşî derheqê kontrolan de melumat da û va ke seba ke vernîya lêminîya derûdorî bigîrê û weşîya şarî bipawê ê kontrolan biperîyodîk kenê.

Gungormûşî wina qisey kerd: "Koordînasyonê Kontrolê Weşîye bi pêşengîya Serekîya Daîreya Karê Weşîye yê Şaredarîya Amedî ya Şaristanê Girdî ame têhet. Koordînasyon, kontrolanê xo yê OSBya Çewlikê Besî dewam keno. Ma kontrolanê xo yê verênan de seba ke xeletî û kêmanîyê ke ma dîbî bêrê wedarnayene, îqazî kerdbî. Kontrolanê xo yê ewroyî de ma kontrol kerd ka îqazê ke kontrolanê verênan ameyî kerdene yan nê. Ma tesbît kerd ke tayê cayan de xeletî hema dewam kenê û ma seba nînan zabitname tepîşt û ceza da înan."