Şaredarîya Amedî ya Bajarê Girdî û şaredarîyanê qezayan pîya programê perwerdeyî yê bedilîyayîşê îklîmî da viraştene.

Serekîya Daîreya Vurîyayîşê Îklîmî û Eşteyo Sifir yê Şaredarîya Bajarê Girdî, Merkezê Kultur û Kongreyî yê ÇandAmedî de bi nameyê "Tetbîqatê Eşteyê Sifirî" Programê Perwerdeyî yê Vurîyayîşê Îklîmî viraşt.

Teber ra şaredarîyanê qezayan, Şaredarîya Nisêbînî zî seba ke nimûneyê "Tetbîqato Weş" pêşkêş bikê beşdarê programî bîy.

'Vurîyayîşê îklîmî rastîyêk o ke tehdîtê estbîyayîşê ma yê xozayî keno'

Serekê Daîreya Vurîyayîşê Îklîmî û Pûçê Sifirî Evin Dinar derheqê muhtewa û amancê programî de melumat da û va ke înan şaredarîyanê qezayan reyde seba ke tesîranê vurîyayîşê îklîmî ra xo bipawê ameyê pêser.

Dinar va ke vurîyayîşê îklîmî êdî dinya de rastîyêk o ke tehdîtê estbîyayîşê xozayîyan keno û wina dewam kerd: "Ma ewro tîya de şaredarîyanê qezayan reyde seba ke derheqê tetbîqatanê eşteyê sifirî de yewbînî reyde bixebitîyê û karê xo koordîne bikerê, ameyê pêser. Vurîyayîşê îklîmî êdî dinya de rastîyêk o ke vera ma de estbîyayîşê ma yê xozayîyan tehdît keno. Na noqta de tetbîqatê eşteyê sifirî zî vera tesîranê vurîyayîşê îklîmî de çîyêko zaf muhîm o."

'Ma do hêz bidê koordînasyonî'

Dinar dîyar kerd ke ê do yewbînan reyde kar bikerê û koordînasyonî hêzdarêr û va: "Teber ra şaredarîyanê qezayan, Şaredarîya Nisêbînî zî seba ke nimûneyê 'Tetbîqato Weş' pêşkêş biko beşdarê nê kombîyayîşî bîy. Ma do seba bajarê xo pê hetkarî û hevrayîya yewbînan, karê îdarekerdişê eşteyan de tetbîqatê eşteyê sifirî hem teorî de hem zî pratîk de biyarê ca û no demo ke yeno, ma pîya do pê hêzê koordînasyon û pîyaxebitîyayîşî reyde kar bikê."

'Bi hemkarîye problemî hal benê'

Dinar va ke dewamîya kombîyayîşî seba înan zaf muhîm a û wina dewam kerd: "Ma nê pêşnîyazê ke vejîyayê meydan û goreyê pêşnîyazanê rayberdaranê şaredarîyanê qezayan ma do ney rutînê xo de bikerê plan. Ma fikirîyenê ke no tewir kombîyayîş do hem tecrubeyê şaredarîyanê ke nê xebatî kerdî, hem zî şaredarîyê ke hema nêkerdî, înan rê rayîr akero ke bi hemkarîye problemanê xo rê çare bivînê."

Qerarê her aşme de pêseramêyîş

Bi amancê ke balkêşîya vurîyayîşê îklîmî bêro zanayene programê ke virazîya, tede bi rayberîya Şaredarîya Bajarê Girdî qerarê kombîyayîşê koordînasyonî yê ke her aşme de yew rey bêro viraştene, ame girewtiş.