Şaredarîya Amedî ya Bajarê Girdî, cayanê cîya-cîyayanê bajarî de di îstasyonê şarjî yê bînî ronayî û seba kesanê astengdaran ke wasitaysnê biakuyan xebitnenê, xizmetêko bêheq dana.
Serekîya Daîreya Xizmetanê Sosyalan, xizmetanê xo yê ke seba şarê astengdarî yê, dewam kena. Hetê Mudirîya Şubeyê Xizmetanê Astengdar û Pîran a girêdayeyê Serekîya Daîreya Xizmetanê Sosyalan, teber ra îstasyonanê şarjê akuyan ke verê cû Parkê Sumerî, Keyeyê Arisîyayîş yê Kayapinarî, Merkezê Cuya Aktîfî yê Kayapinarî û Keyeyê Arisîyayîşî yê Şehîdlikî de ronayîbî, di cayanê bînan de zî dest bi xizmetan kerd.
Avantajê şarjê bilezî
Serekîya Daîreya Xizmetanê Sosyalan, seba waştişê ronayîşê îstasyonê şarjî yê wasitayanê biakuyan yê astengdaran cayanê ke şar zaf şuxulneno, tede gamêk eşt. Na çarçewa de, kîşta aşxaneyê şar ke Meydanê Berê Koyî û Kuçeya Hunerî ya Ofîsî de ameya akerdene, kîşta înan de îstasyonê şarjî yê wasitayanê biakuyan ameyî ronayene. Bi no qayde, şarê ma yê astengdarî ke wasitayanê biakuyan xebitnenê, wexto ke teber ra wext vîyarnenê do bêy ke hewceyîya xo bi prîz, elektrîk yan zî cîhazê şarjî bibo, eşkenê wasitaysnê xo bêheq û bilez şarj bikê.
'Ma do xîtabê her kesî bikê'
Mudirê Şubeyê Xizmetanê Astengdar û Pîran Îsmaîl Dêgirmencî derheqê xebatanê înan de melumat da û va ke seba ke bala şarî biancê çendrenganîya bajarî û seba ke ê bizanê ke heme pîya cuya hempare şênê biciwîyê, bi fikrê ke xîtabê şarê her kesî bikê, polîtîkayanê astengdaran ke amade bîyê, do dewam bikerê.
'Ma bi waştişê şarî dest bide kerd'
Dêgirmencîyî dîyar kerd ke seba ke cewabê waştişan bidê înan projeyî amade kerdî û va: "Wexto ke ma xebatanê planê stratejîkî yê 2025-2029î kerdêne, ma bi fehmê şarşaredarîye û beşdarîye, heme dînamîkanê sîvîlan ê bajarî, komelê ke wareyê astengdaran de xebitîyenê, goştarî kerdî û ma goreyê îhtîyacanê înan hereket kerd. Bi taybetî ma bi waştişê şarê ke astengê înan ê fîzîkî est o dest bi nê rayîrî kerd. Badê naye zî ma do goreyê waştişanê astengdaran cewabê îhtîyacanê înan bidê."
'Ma îstasyonê şarjî ronayî'
Dêgirmencî ard vîrê şarî ke Şaredarîya Bajarê Girdî seba ke cuya astengdaran asan biko zaf waran de xizmetanê muhîman kena û wina dewam kerd: "Bi no hewa seba ke astengdarî wasitayanê xo yê biakuyan rehet bişuxulnê û seba ke rehet eşkê şarê bajarî de bigêrê ma îstasyonê şarjî ke îhtîyacê şarjî temîn kenê, ronayî. Bi no qeyde ma zaf xebetîyenê ke heme nuqtayanê bajarî de nê îhtîyacî temîn bikê."
'Îstasyonê şarjî seba ma hîna weş bî'
Serekê Kulubê Sporî yê Hêzê Astengdaranê Ortopedîkan yê Amedî Nîzamettîn Karaçamî va ke Şaredarîya Bajarê Girdî seba astengdaran xizmetanê muhîman kena.
Karaçamî va: "Zafê astengdaran, badê ke keyeyan ra vejîyenê, wexto ke şarjê înan rayîr ra qedîyeno, rayîr ra manenê. Coka mecbur manenê ke hetkarîya şarî bigîrê. Îstasyonê şarjî ke Şaredarîya Bajarê Girdî ronayî, seba ma hîna weş bî. Êdî astengdarî hewceyê kesî nêmanenê. Ez seba ke piştî dayo astengdaran Şaredarîya Bajarê Girdî rê sipas kena."
'Heme xizmetî bêproblem yenê kerdene'
Astengdaro ortopedîk Metîn Selçukî zî va ke o nê xizmetê Şaredarîya Bajarê Girdî ke seba astengdaran kerdo, tira zaf memnun o û wina dewam kerd: "Ronayîşê nê îstasyonan ma kerdî keyfweş. Embazê ma yê astengdarî kuçeyan ra mexdûr bîyêne, kuceyî ra mendêne. Hemşaredarî roja ke ameyî heta ewro rasta zî xizmetanê girdan kenê. Seba embazanê ma yê astengdaran heme xizmetan bêproblem kenê."
Astengdaro ortopedîk Muhammed Nurullah Tîyençîyî zî dîyar kerd ke problemê şarjî hal bîyo û va: "Ma astengdarî wexto ke şîyêne teber mesela AVM, parke û baxçeyan ma mexdûr bîyêne. Wexto ke şarjê erebayanê ma biqedîyêne ma rayîran ra mendêne. Ma seba ke îstasyonê şarjî ronayî şaredarîya xo rê sipas kenê."
Do hûmara îstasyonanê şarjî bêra zêdekerdene
Şaredarîya Bajarê Girdî, sînorê bajarî de hedef kerdo ke hûmara îstasyonanê şarjî yê akuyan vêşî bikero.
