Zarokistan Kreş û Keyeyê Pawîtişê Rojkî ke binê Şaredarîya Amedî ya Bajarê Girdî de do xizmetanê zafziwanîyam bidê, tede seba serra perwerdeyî ya 2024-2025î zengilo verên cinîya.

Serekîya Daîreya Xizmetanê Sosyalan, Zarokistan Kreş û Keyeyê Pawîtişê Rojkî ke demê qeyyuman de bêfonksîyon mendbî, seba serra newîye ya perwerdeyî amadekarîyê xo qedênayî.

Hetê Serekîya Daîreya Karanê Fenî ra Zarokistan Kreş û Keyeyanê Pawîtişê Rojkî yê Bagcilar û 450 Evlerî de yew tamîrkerdişo hîra ame kerdene.

Wendekaran dest bi dersan kerd

Badê ke xebatî qedîyayî, Zarokistanan de zengilo verên cinîya û wendekaran dest bi dersan kerd.

Seba akerdişê dezgeyanê perwerdeyî merasîmêk virazîya û nê merasîmî de Hetkarê Sekreterê Pêroyî Zerrin Turk û Ozgur Yildiz, endamê meclîsî, serekê daîreyan û may û pî beşdar bîy.

Badê ke qordeleyê akerdişî ameyî birnayene, Hetkarê Sekreterê Pêroyî û kesê ke înan reydê bîy, sinifî gêrayî û wendekar û welîyan reyde eleqedar bîy.

Ma do hûmara Zarokistanan vêşî bikê

Endama Meclîsê Daîmî ya Şaredarîya Bajarê Girdî Demet Ceylan qiseykerdişê akerdişî de va ke înan 8 serran ra dima bi yew heyecanêko pîl akerdişê Zarokistanî kerdo.

Ceylan hêvî kerd ke Zarokistanî seba Amed û gedeyan xeyrin bê û wina dewam kerd: "Ma ewro Zarokistanî akerdî. Ma bi heyecan doman û may û pîyê înan ewro kerdî mêman. Domanî ameyoxê ma yê, seba ameyoxê domanan ma çiqas bikerê zî ma kêmî manenê. Dewamê nê xebatanê ma do bêro û demê ameyoxî de ma do hûmara Zarokistanan zêde bikê. Ez serra perwerdeyî û musnayîşî de seba gedeyan serkewtiş wazena."

360 wendekarî do perwerde bivînê

Serekê Daîreya Xizmetanê Sosyalan Serkan Demirkiranî zî va ke înan heyecanê akerdişê Zarokistanan reyna hîs kerdo û wina dewam kerd: "Ma sey Şaredarîya Amedî ya Bajarê Girdî kreşê Zarokistanî akerdî. Kreşê ma yê 450 Evlerî de ma dest pêkerd ke bi pêroyî 160 wendekaranê xo rê xizmet bidê. Ma sey verê bi perwerdeyê zafziwanî reyna dest pêkerd. Kreşê ma yê Bagcilarî de zî ma bi 200 wendekaran dest pêkerd. Ma do bi pêroyî 360 wendekaranê xo rê xizmet bidê."

Hedefê ma o yo ke hûmara kreşanê xo zêde bikê

Demirkiranî va ke goreyê waştişanê şarî xizmet kenê û wina qeyd kerd: "Ma do gedeyan rê hîrê cemî werd bidê: taştîya şodirî, werdê nêmrojî û werdê êreyî. Ma hedef kenê ke hûmara nê kreşanê xo bajar de zêde bikê. Ma do nînan zî pêşkêşê xizmetê şarê xo bikê."

Perwerdeyê verê dibistane

Zarokistan Kreş û Keyeyanê Pawîtişê Rojkî de domananê 3-6 serreyan rê, çarçewaya perwerdeyê verê dibistane de qabîlîyetî yenê musnayene. Domanî, çarçewaya aktîvîteyanê sosyalan de do atolyeyanê drama, muzîk û hunerî ra îstîfade bikê.

Kreş û Keyeyanê Pawîtişê Rojkî de aktîvîteyê verê dibistane do zafziwanî bêrê dayene. Domanî, mîyanê roje de mabênê saetanê 08.00 û 17.00î eşkenê kreşanê Zarokistanan ra îstîfade bikê.