Hemşaredara Şaredarîya Amedî ya Bajarê Girdî Serra Bucak, beşdarê galaya fîlmê Bilûra Nîşoyî bîye.

Galaya fîlmê Bilûra Nîşoyî yê rejîsorîya Sedat Kiranî, ke behsê Digran Nîşyanî (Nîşo) yo marangoz û hostayîay bilûran keno ke keyeyê Nîşyanan ra yo û keyeya înan serrê 1915î de tehcîrê Ermeniyan ra xelesîyayo, Dêra Surp Gîragosî de virazîya.

Hemşaredare Bucak ke fîlm rejîsor Kiran û mêmanan reyde temaşe kerd, va: "Dîyayîşê pîyabîyayîşê her kesê ke xo Amedij hîs keno nê fîlmê ecêbî ma pêrune zaf hîsdar kerd."

Bucak dîyar kerd ke rejîsor Kiranî fîlm de Amed zaf weş îfade kerdo û wina dewam kerd: "Ez şima zerrîya xo ra pîroz kena, karêko zaf qiymetin vejîyayo meydan. Şima na erdnîgarî zaf weş îfade kerda, destê şima weş bê. Belkî çarêgê hîkayeyanê ke ganî na erdnîgarî de bêrê vatene, nêameyê vatene. Ma qalê derd û kulî, qirkerdiş, sirgûn û heqîqetan kenê la rindîya ci zî est a. Hafizaya nê bajarî ganî ya, hafizaya xo vindî nêkena, wayîrê ci vejîyena. Wayîrîya birayîya xo û pîyabîyayîşê xo vejîyena. Temaşekerdişê nînan fîlm de zaf rind bi."

Hemşaredare Bucak reyde Sekreterê Pêroyî yê Şaredarîya Bajarê Girdî Emrullah Gorduk, hetkarê Sekreterê Pêroyî Reşat Bakan, endamê meclîsî û serekê daîreyan beşdar bîy.