Hemşaredarê Şaredarîya Amedî ya Bajarê Girdî Dogan Hatun, Dewa Kuye (îslamkoy) ya girêdayeya qezaya Pasûrî de ame têhet şarî reyde û va ma do vera gêrayîşê madenan, wayîrîye aw û erdê xo bivejîyê.

Hemşaredarê Şaredarîya Amedî ya Bajarê Girdî, zîyaretê taxan kenê û şarî reyde yenê têhet. Hemşaredar Dogan Hatun, zîyaretê Dewa Kuye ya qezaya Pasûrî kerd. Hemşaredarê Şaredarîya Amedî ya Şaristanê Girdî, bi zîyaretê taxan şarî reyde têkilîya xo dewam kenê. Hemşaredar Dogan Hatun, Taxa Kuye ya Qezaya Pasûrî zîyaret kerd. Hemşaredarê Şaredarîya Pasûrî Fatma Ay û Murat Îpek, Hemşaredarê Şaredarîya Baglarî Sîrac Çelîk û Hemşaredarê Şaredarîya Yenîşehîrî Mehmet Ergun, Hemşaredar Hatun reyde pîya bîy. Hemşaredar Hatun taxe de goşdarîya problemanê şarî kerd û va Şaredarîya Bajarê Girdî seba ke çareserîya problemanê şarê ke dewanê dûrî de ciwîyenê bivîno, xebetîyena.

'Ganî ma wayîrîya awa xo bikê’

Hemşaredar Hatun, vera gêrayîşê madenan ke wazenê Mintiqaya Kasorî de bikerê, reaksîyon nîşan da. Na mintiqa de dewê Kaxvas, Kuye, Tîyaxs, Arkatîn û Xarûca est ê. 

Hemşaredar Dogan Hatun, derheqê gêrayîşê madenanê bêusulî de nê çî vatî: "Ewro bi metodonanê qilêrinan wazenê erdê ma bigîrê. Ma heme qezayanê Amedî de nê çî şarê xo ra vatî: Awa ma, erdê ma bes ê ma pêrune rê, ganî ma wayîr bivejîyê. Eke ma wayîrîya aw û erdê xo bikê, ma eşkenê 10 welatan zî xelas bikê. Ma eşkenê pêroyê şarê Rojhelatê Mîyanênî mird bikê. Yanî çimeyê ma yê awe hende dewlemend ê û awa ma hende pak a. Awa ke tîya ra vejîyena, Hewêdîyanî û hemê dewanê dorûverî mird kena. Tena yew çime yo la bes o hezaran kesan rê. Awa Çemê Dîcleyî bîyarê xo vîrî, bes ê çend kesan a. Yew rey zî erdê ma yo bereket bîyarê xo vîr, eke şima biramê do çend kesan mird bikero. Bi hezaran serre ke awa Çemê Dîcleyî qet nêbirîyaya. Ez bawer kena ke, eke ma wayîrîya na tebîetê pakî bikê, ma ra dima zî amoeyoxê ma zî hezaran serran merdimîye do ey ra îstîfade bikero. Hende tebîetêko pak, awêka pake û erdêko dewlemend."

'Ma heqdar ê, ma do erdê xo bipawê'

Hatunî va "Tebîet tena însanan rê nîyo. Tebîet, wayîrvejîyayîşê daran o, wayîrvejîyayîşê mîrûran o ke binê erdî de yê." û wina dewam kerd: "Ma bêhêz nîyê, wa kes nêterso, ma bihêz ê. Eke lazim bo ma do gonîya xo birijnê la ma destûr nêdanê ke ê madenkarî bêrê nê erdî. Rayîran virazenê, vanê ma do eskeran bîyarê. Ê Koyê Hasanî rê zî eskerî ardî. Eskeran se kerd? Qet çîyêk. Çunke ma heqdar ê. Hêzê ma est o ke ma erdanê xo bipawê. Teqrîben 20 hezarî kesî tîya ra awe şimenê. No heqê ma yo tebîî yo. Tîya de çîyêko ke ma ey ra bitersê çin o. Do bêrê erdê ma îşxal bikerê, awa ma bibirrnê, ma dewe ra vejê, ê do xurt bibê û ma do biqedîyê, wina? Ney! Çîyêko winasî nêbeno."

'Mintiqa seba turîzmî weş a' 

Hemşaredar Hatunî bale ant ser ke mintiqa seba turîzmî weş a û wina va: “Çira tena madenan fikirîyenê, çira turîzmî nêfikirîyenê? Tirkîya de tebîetêko wina weş çend cayan ra est o? Bê, reklamê naye bikê, wa turîstî bêrê, çiqas ke ti madenan ra qezenc kenê, ti eşkenî hende pereyî qezenc bikerê.”

'Çimeyanê awe ser o gêrayîşê madenan goreyê qanûnî qedexe yo' 'Ma do game bi game heme probleman çareser bikê' Hemşaredar Hatunî va ke ê mintiqa de taxe bi taxe gêrenê û kombîyayîşan kenê û dîyar kerd ke ê do vera şîrketanê madenan vinderdê. Hemşaredar Hatunî qiseyê xo wina qedênayî: "Çimeyanê awe ser o ê nêeşkenê xebatanê madenan bikerê, no qanûnan de qedexe yo. 8 serrî yo kesî selamê Homayî zî nêda nê dewan. La ma ameyî û ma tîya ra nêşinê. Ma do tîya de bibê. Ma do sozanê xo yê ke ma weçînayîşî de dayê şarê xo, bîyarê ca. Ma do game bi game heme probleman çareser bikê. Nê dewê ke ameyê xovîrakerdene, înan rê heta ewro çilkêka awe zî nêdîyaya, heta ewro xizmetêk zî nêbîyo, ma do 5 serranê verê xo de heme problemanê înan game bi game çareser bikê."