Şaredarîya Amedî ya Şaristanê Girdî, 6 aşmanê peyênan de 12 qezayanê dewan de 250 kîlometre rayîrê neweyî qedênayî û dekerdî xîzmetê şarî.

Serekîya Daîreya Koordinasyonê Viraştişê Rayîr û Binawanîyan, seba ke rayîrî bêrê halêko hîna emnîyetin û rehet, 17 qezayanê bajarî de cayanê dûrîyan de rayîrê grûbe yê taxan û girêdayîşanê înan de xebatanê binawanî, pirrkerdiş, stabilîze û asfaltî kena.

Ekîbî ke dewan de rayîrê grûbe yê taxan de rayîranê neweyan virazenê û problemanê resî çareser kenê, seba emnîyetê şarî xebatêka fedakarane kenê.

Ekîbanê Şaredarîya Şaristanê Girdî, qezayanê Baglar, Çêrmug, Çinar, Pîran, Erxenî, Licê, Farqîn, Şankûş, Hêni, Kayapinar, Yenîşehir û Sûrî de dewan de 6 aşmanê peyênan de 250 kîlometre rayîrî qedênayî û dayî xîzmetê şarî.

12 qezayan de xebatî qedîyayî

Çerçewaya viraştişê rayîran de, qezaya Baglarî de 14 kîlometre asfaltê rîverî, 2 hezar û 900 metrekare kerraya kilîtine, 15 hezar û 700 ton asfalto germin rokerd.

Qezaya Çêrmug de dewan de 27 kîlometre asfaltê rîverî, 16 hezar û 610 metrekare kerraya kilîtine ronayî, 18 kîlometre rayîrî de xebatê xo dewam kenê.

Ekîban, Çinar de dewan de 24 kîlometre asfaltê rîverî, 20 hezar û 800 metrekare kerraya kilîtine, 10 kîlometre rayîrê stabilîze/binawanî û 13 borîyê awa varayîşî; Pîran de 43 kîlometre asfaltê rîverî, 63 hezar metrekare kerraya kilîtin, 3 hezar û 260 metrekub dêsê kerrayan; Erxenî de zî 92 kîlometre asfaltê rîverî, 50 hezar metrekare kerraya kilîtine, 15 kîlometre rayîrê stabilîze/binawanî, 6 hezar û 960 metrekub dêsê kerran û borîyê awa varayîşî virazîyayî.

Qezaya Sûrî de zî, 8,5 kîlometre asfaltê rîverî robî, 7 hezar û 840 tonî asfalto germin robî, 5 kîlometre rayîrî de amadekerdişê asfaltî dewam keno.

Ekîban, Licê de 25 kîlometre rayîrê stabilîze/binawanî, 11 hezar û 120 metrekubî dêsê kerrayan; Farqîn de 11 hezar û 640 ton asfalto germin û 6,8 kîlometre BSK, Şankûş de 3 kîlometre rayîrî de stabilîze; Hêni de 4 hezar û 100 metrekare kerraya kilîtin, Kayapinarî de 10,5 kîlometre asfaltê rîverî; Yenîşehirî de 28 hezar û 700 metrekare kerraya kilîtin, 9 kîlometre de xebatê asfaltê rîverî qedênayî.

Karaz û Bismil de zî cayanê ke tesbît bîyê, tede amadekerdişê asfalt û rayîrî benê.

'Ez Şaredarîya Şaristanê Girdî rê sipas kena'

Gama ke xebatê ekîban rayîranê dewan de dewam kenê, şarî va ke ê xizmetan ra ke ameyê kerdene, memnun ê. Muxtarê Dewa Misîrikî Faysal Temelî va ke o xebatan ra zaf memnun o û wina dewam kerd: "Ekîbanê Şaredarîya Şaristanê Girdî, rayîrê 22 kîlometre yê 8 dewan viraşt. Pirdo ke ma 45 serre verê cû bi îmkananê xo çemî de viraştbi, ekîban reyna viraşt. Ez seba nê xizmetan Şaredarîya Şaristanê Girdî rê sipas kena."

'Înan rayîr û pirdê ma zaf rind viraşto'

Şarê dewe ra Abdurrahman Temelî bi kurdkî va ke o xizmetê rayîrî ra memnun o û wina qisey kerd: "Şaredarîya Amedî ya Şaristanê Girdî xizmetêko pîl da ma. Zimistan ameyêne, rayîrê ma xirabe û çamir bîyêne û erebeyê ma xirabe bîyêne. Ewro ma vînenê ke xizmetêko rind dayo ma. Înan rayîr û pirdê ma zaf rind viraşto. Ma nê xizmetan ra zaf keyf girewt. Ez zaf sipas kena. Ez wazena ke nê xizmetê weşî dewam bikerê."

Şarê dewe ra Hatip Temelî zî va ke verê cû erebeyê înan tim lêmin bîyêne û coka înan tim ganî erebeyê xo bişutêne, ey Şaredarîya Şaristanê Girdî rê ke rayîrê neweyî viraştê, sipas kerd.