Hemşaredarê Şaredarîya Amedî ya Bajarê Girdî Serra Bucak û Dogan Hatun, beşdarê merasîmê kupayan bîy ke ASKF’yî viraştbî. Hemşaredar Hatunî va ke ê do 5 serran de seba ameyoxê gede û ciwanan heme beşanê sporî de xebatan bikerê.

Federasyonê Klubanê Sporî yê Amatoran (ASKF) seba klubanê ke sezonê futbolê amatorî yê 2023-2024î de bîyê şampîyon û vejîyayê lîganê corênan, merasîmê kupayan viraşt. Merasîmo ke Merkezê Kultur û Kongreyî yê Çand Amedî de virazîya, Hemşaredarê Şaredarîya Amedî ya Bajarê Girdî Serra Bucak û Dogan Hatun, Hemşaredarê Şaredarîya Sûrî Fatma Gulan Onkol û Adnan Orhan, Hemşaredarê Şaredarîya Yenîşehirî Mehmet Ergun, Hetkarê Sekreterê Pêroyî yê Şaredarîya Bajarê Girdî Reşat Bakan, Serekê ASKFyî Remzî Dayan û sporbazî beşdar bîy.

'Hemşaredarî çi ke dest ra yeno kenê, ma do meyweya ci bigîrê'

Serekê ASKF’yî Remzî Dayanî qiseykerdişê akerdişî de va ke problemê lîganê amatoran nêqedîyayê û wina dewam kerd: "Reyna zî ma welatîyê yew bajarê gird ê, la çı heyf qasê bajaranê qijan tesîsê ma çin ê. Hemşaredarê Bajarê Girdî çi ke dest ra yeno kenê, ma seba naye sipas kenê, ma do meyweya ci bigîrê."

Hemşaredar Hatun: Ma do goreyê hêza xo gaman bierzê

Hemşaredar Dogan Hatunî zî merasîmî de qisey kerd û va ke ê seba merasîmê kupayan ê ASKF’yî ameyê têhet û ciwanî pîroz kerdî. Hatunî va ke înan Planê Stratejîk yê 5 serran de heme kêmanîyê beşanê sporî tedqîq kerdî û wina dewam kerd: "Helbet butçeya ma bêsinor nîya. Ma do bi butçeya xo ya sinorkerdîye goreyê hêza xo gaman bierzê la ma waşt ke cayêk de ma gamêk hîna zêde bierzê."

'Ma heme tesîsan tamiratî ra vîyarnenê'

Hatunî va ke ê xo rê derd kenê ke Amed de yew tesîsê sporî ke bireso daraxê sahayanê mîyanneteweyî û olîmpîyadan çin o û seba naye înan yew ersa ke girêdayeya Milkê Millî yo, Wezaretê Derûdor, Bajarwanîye û Vurîyayîşê Îklîmî ra waşto la waştişê înan red bîyo. Hatunî va ke reyna zî ê nêvindertê, înan xalî sahayê û kortê tenîsî yê taxan û heme tesîsê ke Şaredarîya Bajarê Girdî rê aîd ê, tamirî ra vîyarnayê. Ey va ke înan seba tesîsê Seyrantepe Şilbeyî yew projeyê kompleksê sporî yo gird hazir kerdo, muzakereyê înan walîtîye reyde dewam kenê û eke walîtî qebul biko ê do tesîsê binawanî bîyarê ca.

'Ma sozê xebate danê'

Hatunî va ke ê wazenê beşanê bînanê sporî de zî ke binawanî xurt kenê amadekerdişan bikerê û wina dewam kerd: "Îdareyê verênan de salonê sporî ke Şaredarîya Bajarê Girdî rê aîd ê, sazgehanê bînan rê ameyê dayene, ma kêmanîya naye zaf ancenê. Tesîsê Şaredarîya Bajarê Girdî û şaredarîyanê qezayan ke ciwanan xebitnayêne, kêmî yê. Ma derheqê naye de dest bi nuştişan kerd. Ma wazenê ke ma awanîyê xo yê ke ma de yê, tepîya bigîrê, ma seba 5 serran yew planê stratejîk hazir kerd ke eşkeno xizmet bido komelî, eşkeno heme kêmanîyanê qada sporî bivîno. Gêrayîşê ma heta awankerdişê cayanê neweyan do dewam bikê. Ma zanê ke nê bajarî de heme beşanê sporî de yew potansîyelêko ecêb est o. Gama ke Serekê Federasyonê Futbolî yê Tirkîya ame Amedî, ma ey reyde qisey kerd, ma kêmanîyê qada sporî ci rê vatî, ma seba yew tesîsê daraxê mîyanneteweyî hetkarî waşt. Ey zî soz da û va 'ma do goreyê hêza xo hetkarî bidê projeyê şima yo ke şima wazenê virazê.' Ma vera şima soz danê ke ma nê 5 serran de seba ameyoxê gede û ciwanan tena futbol de nê, heme beşan de xebatan bikerê."

Hemşaredaran rê plakete ameye dayene

Badê qiseykerdişan Serekê ASKF'yî Remzî Dayanî, seba hetkarîyan ke Hemşaredaran Serra Bucak û Dogan Hatunî dayo klubanê sporî yê amatoran, înan rê plakete da.

Tîman rê kupa ameye dayene

Hemşaredarî Bucak û Hatunî, tîmanê ke mîyan de Amedspor zî est o, lîganê amatorî de bîyê şampîyon û vejîyayê lîganê corênan, înan rê kupayê înan dayî.