Hetê Şaredarîya Amedî ya Şaristanê Girdî ra çarçewaya Hefteyê Îtfaîye de Qezaya Bismilî de wendekaranê rê perwerdeyê mudaxeleyê adirî ame dayene.

Serekîya Daîreya Îtfaîye, munasebetê Hefteyê Îtfaîye ke 25ê Êlule-1ê Teşrîne de yeno pîrozkerdiş, seba rewşa lezgîne û badê ci do çi bêro kerdene, derheqê nê babetan de perwerdeyê teorîk û pratîkî organîze kena.

Programê perwerdeyî de ke yew dibistanê Qezaya Bismilî de ame organîzekerdene, derheqê mudaxeleyê adirî de melumatê teorîkî dayîyayî wendekaran.

Îtfaîyekaran dîyar kerd ke gama ke cayêk adir bigîro, ganî 112 Merkezê Vengdayîşê Acîlî bêro vengdayene û derheqê tedbîranê adirî de wendekaran rê pêşkêşî kerd.

Personelê îtfaîye, wendekaran rê tedbîrê vernîgirewtişê adirî, çîyê ke gama adirî de ganî bêrê kerdene, teknîkê temirnayîşê adirî, hacetê temirnayîşê adirî, wezîfeyê wasitayanê îtfaîye û melumatê bingeyinî yê adirî îzeh kerdî.

Perwerdeyê pratîkî yê temirnayîşê adirî

Mamosta û wendekaranê rê, bi hemkarîya îtfaîyekaran perwerdeyê temirnayîşê adirî û mudaxeleyê adirî ame dayene. Îtfaîyekaran ke wasita û hacetê îtfaîye da şinasnayene, qonaxê mudaxeleyê adirî bi pratîk nîşan da.

Her qismî rê perwerdeyê adirî

Îtfaîyeya Amedî, çarçewaya Hewteyê Îtfaîye de merkezê bajarî û qezayan de kreş, verdibistane, dibistanê verênî, dibistanê mîyanênî, lîse, merkezê ciwanan, nêweşxane û dezgeyanê bînan ê umûmîyan de perwerdeyî organîze kena û do wendekaran Serekîya Daîreya Îtfaîye de mêman bikero.

Şaredarîya Amedî ya Şaristanê Girdî, bi aktîvîteyanê ke organîze kena, wazena hişmendîya mucadeleyê adir û emnîyetî bifetilno her qismê komelî ser.

'7î ra heta 70î perwerde'

Îhsan Gezer, Serîtfaîyeyê Perwerdeyî yê Serekîya Daîreya Îtfaîye ke perwerdeyî de melumat da, va ke bi perwerdeyî hedefê înan o yo ke 7î ra heta 70î her qismî derheqê adirî de hişmendî bikerê.

Gezerî wina va: "Çarçewaya Hewteyê Îtfaîye de ma cehd kenê ke domananan rê muhîmîya îtfaîye, karê ke kenê, wezîfe û berpirsîyarîyê bingeyinî îzeh bikerê. Eynî wext de ma îzeh kenê ke senîn mudaxeleyê adirî beno, seba ke ma adirî reyde rî bi r nêmanê do kamcîn tedbîr û vernîgirewtişî bêrê girewtene, ma melumatanê laziman danê. Eynî wext de merkezê ciwanan, dezge û sazgeyanê umûmîyan de perwerdeyê ma do dewam bikerê."