Şaredarîya Amedî ya Şaristanê Girdî, seba ke can û malê şarî bipawê, 5 qezayan de ekîpman û binawanîya Îtfaîye xurt kena.

Şaredarîya Şaristanê Girdî, seba ke wasitayê Îtfaîye şertanê hewayî û tesîranê teberî ra bêrê pawitene, hacetê ke qezayan de kêmî yê temam kena.

Na çarçewa de hetê Serekîya Daîreya Karê Fenî ra Qezayanê Gêl, Hezro, Çinar û Licê de 1, Qezaya Farqînî de zî 2 hangaran reyde pêro pîya 6 hangarî ameyî viraştene.

Qezaya Farqîn de 4 wasitayî, qezayanê bînan de zî 2 wasitayî eşkenê tede ca bigîrê û zereyê nê hangaran de îstasyonê pirrkerdişî zî ameyî ronayene. Bi no qayde ekîpê îtfaîye ke adirê girdan sey daristan û vaşê ziwayî reyde demî reyde reqabet kenê, karê pirkerdişî ra dem qezenc kenê.

Hangarî eynî wext de do sey îstasyonê tamîrî zî bixebitîyê ke xirabiyanê teknîkî yê wasitayanê îtfaîye wedarê.

'Demî ra tasaruf keno'

Amirê ke Serekîya Daîreya Îtfaîye de xebetîyeno, Îhsan Gezerî va ma cehdê xo kenê ke kêmanîyanê teşkîlata îtfaîye temam bikerê. Gezerî dîyar kerd ke bi saya hangaran do karê pirrkerdişê wasitayanê îtfaîye ra dem qezenc bikerê û wina dewam kerd: "Ma zereyê hangaranê xo de îstasyonê pirrkerdişa awe yê zêdeyî ronayî. No zî ma rê tasarufê demî keno. Bi taybetî wexto ke adirê vaşê ziwayî de ke cayanê girdan û daristanan de adir gêno, ma do wasitayanê xo yê îtfaîye hîna lez pirr bikê û reyna şêrê cayê serebûdî."

Gezerî dîyar kerd ke hangarî avantajanê pîlan danê teşkîlata îtfaîye û va ke bi no qayde wasitayê îtfaîye tesîranê teberî û şertanê hewayî ra yenê pawitene û no do emrê wasitayan derg bikero.