Konserê Kardeş Turkulerî û Hevra de ke Şaredarîya Amedî ya Şaristanê Girdî Meydanê Şêx Seîdî de organîze kerd, bi hezaran kesî ameyî têhet.

Serekîya Daîreya Karê Kultur û Sosyalî yê Şaredarîya Şaristanê Girdî, Meydanê Şêx Seîdî (Berê Koyî) de bi beşdarîya grûbanê Kardeş Turkulerî û Hevra konserêk organîze kerd. Konserî de Hemşaredarê Şaredarîya Şaristanê Girdî Dogan Hatun, temsilkarê partîyanê sîyasîyan û rêxistinanê sivîlan reyde bi hezaran şarî beşdar bîy.

Hemşaredar Hatun: Deyîrê ma kêmî nêbê

Hemşaredar Dogan Hatunî verê konserî de qisey kerd û va "Ma vatbî ma do bêrê, hayo ma ameyî Amed. Şima sere û çimanê ma ser ameyî" û sîlam da şarî. Hatunî wina dewam kerd: "Ma vatbî, tayê do şêrê, ma do bêrê. Ma reyna ameyî. Nê cayî reyna cayê ma yê. Deyîrê ma, kulturê ma, ziwanê ma cayanê ma ra kêmî nêbê." Hatunî wina dewam kerd: "Ma kulturê xo rê wayîr vejîyê, ziwanê xo, hunerê xo, herra xo û awa xo. Azadîya ma ma pawena. Nê cayî çiqas zêde pirr bibê ma do hende azadîye û aramî bivînê."

'Ma bi ziwan û kulturê xo tîya yê'

Hemserekê Şaristanî yê DEM Partî Abbas Şahînî zî va 8 serrî yo qeyyuman seba ke şar ziwanê xo û kulturê xo nêşuxulno her tewir rayîr û metodî ceribnayî û wina dewam kerd: "Cayo ke ma resayê, ma bi ciwananê xo, ziwanê xo, kulturê xo tîya yê. Cayê ke tede huner est o, azadîye est a, cayê ke tede azadîye est a, aştî est a. Waştişê ma ciwananê ma ra no yo ke ziwanê xo, kulturê xo, herra xo, kuçeyanê xo û tewr zêde weşîya xo rê wayîr vejîyê."

'Ma wazenê înan reyde deyîran vajê'

Badê qiseykerdişan Grûba Hevra ame sahne, dîyar kerd ke ê tehdayê ke ziwanê kurdkî ser o yê, neheq vînenê û bi deyîranê kurdkî yê ke vatî, şar zaf keyf kerd. Solîsta Kardeş Turkulerî Feryal Oney zî wina va: "Unzîle, Guldunya, Ceylan, Cemîla ke dolaba cemedî de ameye vindarnayene û nika Narîn û zaf nameyê bînî. Ma nê nameyan tena deyîran de nê, ma wazenê cuya înan dewam bikerê. Ma êdî nêwazenê seba înan yas bikerê, ma wazenê înan reyde deyîran vajê."

Her ziwanî ra deyîrî ameyî vatene, govend ame girewtene

Cinîyan, ciwanan, domanan konserê bêheqî de Hevra û Kardeş Turkulerî reyde her ziwanî ra deyîrî vatî û govend girewte.