Mudirîya Pêroyî ya DÎSKÎ yê Şaredarîya Amedî ya Şaristanê Girdî, verê demê zimistanî de seba ke vernîya laser û varan bigîro, xetanê awa varan û kanalîzasyonî de dest bi xebata pakkerdiş û hîrakerdişî kerd.

Ekîbê Mudirîya Pêroyî ya Îdareyê Awe û Kanalîzasyonî ya Amedî (DÎSKÎ), seba ke vernîya probleman bigîrê ke do hewayê varanî de bivejîyê û temîn bikerê ke sîstemê binawanî yê bajarî bêprobleme bixebitîyê, xebata zafe kenê. Çarçewaya xebatan de awa varanî, mazgal û kanalîzasyonî bi hawayêko detayin yenê pakkerdene.

Seba hîşyarîye vengdayîşê şarî 

Mudirê Pêroyî yê DÎSKÎ Mehmet Şerîfogluyî dîyar kerd ke bi taybetî zêdebîyayîşê mîqdarê varanî do bibo sebebê laseran û bale ant muhîmîya nê tewir xebatan ser.

Şerîfogluyî ke va xebatê tamîr û pakkerdişî yê muntezem do pêroyê serre dewam bikerê, waşt ke şar derheqê eştişê maddeyanê xerîban sey qumaş, torbe, plastîk û şûşeyê camî fekê mazgalan û kanalîzasyonî de hîna hîşyar bo.

'Ekîbê ma bi heme kapasîteyê xo xebitîyenê'

Şerîfogluyî qeyd kerd ke eynî xebatî merkezê bajarî de zî qezayan de zî yenê kerdene û wina dewam kerd: "Seba ke sîstemê binawanî bikerê pêt vera şertanê zimistanî û rîskanê muhtemelan bikerê tay, ekîbê ma hem hetê teknîkî ra hem zî hetê çimeyê însanan ra bi heme kapasîteyê xo dewam kenê xebitîyayene."