Ekîbanê Şaredarîya Amedî ya Şaristanê Girdî, munasebetê Roja Kal û Pîran ê Dinya, şarê ke emrê înan 65 û zafêr o, keyeyanê înan de zîyaret kerd.

Ekîbanê Serekîya Daîreya Xizmetanê Sosyalan, munasebetê Roja Kal û Pîran ê Dinya şarê ke emrê înan 65 û zafêr o, tena nêverdayî. Ekîban ke Mudirê Şubeyê Xizmetanê Astengdar û Kalan ê Serekîya Daîreya Xizmetanê Sosyalan Îsmaîl Degirmencî zî tede bî, zîyaretanê keyeyan de şarê emirvêşî reyde sohbet kerd û waştişê înan goşdarî kerdî. Ekîban, şarê ke înan rê bîyî mêman, înan rê paketê dîyarîyan dayî.

'Ma do tim înan reyde pîya bê'

Mudirê Şubeyê Xizmetanê Astengdar û Kalan Îsmaîl Degirmencî ke derheqê xebatanê xo de melumat da, dîyar kerd ke ê do kal û pîranê ma tena nêverdê û wina va: "Ma wexto ke xebatanê Planê Stratejîkî yê 2025-2029 ke tede heme cuye û nasnameyî do heyat bivînê, kerdêne, ma soz dabî ke ma do bi konseptanê şaredarîya beşdare û sosyal xebatanê xo bidê konkretîzekerdene. Ewro 1ê Teşrîna verêne de ma çiqas kal û pîranê xo zîyaret bikerê zî ma mesajê xo yê ke ma verê cû û badê cû zî tim pîya benê, pare kenê. Ma do tim înan reyde pîya bê û piştgirîya yewbînan bikerê."

Xîzmetê ma keyeyan de seba kal û pîran dewam keno

Yewîya Kal û Pîran ke xebatanê xo Serekîya Daîreya Xizmetanê Sosyalan de dewam kena, seba kal û pîîran ke tena ciwîyenê, nêeşkenê hewcedarîyanê xo bîyarê ca, xîzmetê pakkerdişê keyeyan dewam kena.

Ekîbê Yewîya Kal û Pîran, keyeyanê kal û Pîran de ke ameyê tesbitkerdene pakkerdişê sere ra heta peynî kena û seba ke ê cayêko hîna pak û weşî de wext derbas bikerê xebitênê.