Hemşaredara Şaredarîya Amedî ya Şaristanê Girdî Serra Bucak ke akerdişê Workshop Polîtîkayê Cinîyanê Rayberîyanê Herêmkîyan de qisey kerd, bale ante xirabîyanê qeyyûman ser o û va "Ma wina prosesêk de yê ke ma cayanê xirabkerdeyan reyna virazenê".

Hemşaredara Şaredarîya Şaristanê Girdî Serra Bucak, beşdarê "Workshop Polîtîkayê Cinîyanê Rayberîyanê Herêmkîyan" bî ke Merkezê Kultur û Kongre yê ÇandAmedî de ame organîzekerdene. Hemşaredarê cinî yê şaredarîyan, Hemşaredara Verêne yê DBB’yî Gultan Kişanak û temsîlkarê rêxistinanê cinîyan ke beşdarê workshopî bîy, akerdişî de Hemşaredare Serra Bucak qisey kerd û va ke dîyayîşê cinîyan pîya weş û hêvîdar o û qeyd kerd ke mucadeleyê rayberîyanê herêmkîyan û cinîyan ke cinîyan 1979 de Hîlwan de dest pêkerdbî, heta ewro bi kedêka zaf qîmetdare ameye roniştene.

Hemşaredare Bucak: Ganî heme sernameyî bêrê munaqeşekerdene

Bucak ke ard vîr ke 31ê Adare de 78 şaredarîyanê ke DEM Partî qezenc kerdbî, tede sîstemê hemşaredarîye ame tetbîqkerdene, wina dewam kerd: "Workshop de, rayberîyanê herêmkîyan de, şaredarîyanê ma de ganî heme sernameyê polîtîkayê cinîyan, perspektîfê cinîyan û sîstemê cinîyan ê ke ma do senîn bironê, bêrê munaqeşekerdene. Ma zaf wazenê ke bi embazanê beşdaran ê qîmetinî ke do tecrubeyê xo ma rê vajê, ma do nê tecrubeyan ser o munaqeşeyanê xo tîya de girs bikerê û herêmanê xo de, bajaranê xo de, qezayanê xo de, nahîyeyanê xo de, nê xebatî her demî ra hîna biqewet, hîna zêde cinîyan ser o merkezbîyaye biramnê."

'Ma wina prosesêk de yê ke ma reyna virazenê'

Hemşaredare Bucak ke bale ante polîtîkayê qeyyûmî ser o, wina va: "Çîyêk est o ke heme ma tecrube kerd. Bi rastî pratîkêkê qeyyûmanê 8 serran û xirabîyêkê ke nînan viraşto est ê. Wexto ke ma ameyî weçînayene, a roje ra heta nika 6 aşmî yo ma her ca de hîs kenê û ma nê cayanê ma yê ke talankerde de kewtî xebata viraştişî ya neweye. Ma dî ke tecrubeyê rayberîyanê herêmkîyan ê 25 serran de, çîyê ke ma viraştî, verê cû polîtîkayê cinîyan, merkezê mişawirîya cinîyan, îstasyonê gamê verênî, xetê alo şîdet, stargehê cinîyan û pêroyîya nê çîyan de fehmê rayberîyanê herêmkîyan çiqas zêde ameyî xirabkerdene. Ma wina prosesêk de yê ke ma nînan reyna virazenê."

'Ma xizmetê herêmkî afirna

Hemşaredare Bucak ke îfade kerd ke heme bajar, qeza û şaredarîyanê şaristanê girdan de bi keda cinîyan, endamê meclîsê cinîyan, komîsyonê cinîyan û bi ewnîyayîşê cinîyan xizmetê rayberîyanê herêmkîyan ke do ronê, afrinayî, wina qisey kerd: "Demêko kilm sey 6 aşman de zî ma zaf aver şîy. Nika ra dima ma do seba girdkerdişê nê cayan hîna zêde bixebitîyê."