Şaredarîya Amedî ya Bajarê Girdî, çalakîyê ke seba vîrardişê Nuştox Mehmed Uzunî ke şexsîyetanê muhîman yê edebîyatê kurdkî ra yew o, organîze bikero, bi akerdişê nawitgehî dest pêkerd. Hemşaredare Serra Bucak ke akerdişê pêşangeyî de qisey kerd va ke înan xebata kolektîfe seba vîrardişê Mehmed Uzunî kerda.

Nuştox Mehmed Uzun, serregêra 17. serrê mergê ey de bi rêza çalakîyan ke Serekîya Daîreya Karê Kultur û Komelkî û keyeyê Mehmed Uzunî do organîze bikero, yeno vîrardene. Çalakî, bi nawitgehê Axaftina Azadî (Qiseykerdişê Azadî) yê karîkaturîstanê ke Swêd de ciwîyenê Seyda û Ulf Ivann Nilsonî dest pêkerd.

Hemşaredara Bajarê Girdî Serra Bucak û hunermend û hunerhesê bajarî  beşdarê akerdişê nawitgehî bîy ke Merkezê Kulturî yê ÇandAmedî de ame viraştene.

Seyithan Anter ke akerdişê nawitgehî de qisey kerd, va ke ê seba vîrardişê Mehmed Uzunî ameyê pêser û seba çalakîyan ke do bêrê organîzekerdene, sipas kerd Şaredarîya Amedî ya Bajarê Girdî û herkesî rê ke destek dayo.

Hemşaredare Bucak: Her kes eşkeno beşdarê çalakîyanê ma bibo

Hemşaredare Serra Bucak ke akerdişê nawitgehî de bi kurdkî qisey kerd va ke înan xebata kolektîfe seba vîrardişê Mehmed Uzunî kerda û wina dewam kerd: "Gama ke embazan va ma wazenê Amedî de Hewteyê Mehmed Uzunî pîya organîze bikerê, ma va temam. Mehmed Uzun şerefê ma yo. Ziwanê ma zî şerefê ma yo. Coka ma va ma do piştî bidê edebîyatê kurdkî. Ma wazenê ke nê welatî de reyna ziwan, kultur û hunerî awan bikerê. Ma keyfweş ê ke hunermendî Swêd ra ameyê tîya. Ma hêvî kenê ke nê hewteyî de ciwanî, edebîyathesî û edebîyatkarê ke kurdkî ra hes kenê, bêrê beşdarê programanê ma bibê. Di panelê ma est ê. Yew zî çalakîya ma ya vîrardişî est a ke ma do mezelê Mehmed Uzunî ser o bikerê."

'Ma bi raya karîkaturî mucadeleyê Uzunî dewam kenê’

Hunermend Seyda ke derheqê prosesê hazirîya nawitgehî de agahdarî da va ke ê bi hunermend Nilsonî reyde eynî bajar de ciwîyenê û projeyanê muşterekan kenê. Seydayî va ke erjnayîşê Mehmed Uzunî yê derheqê heqanê însanan û demokrasî de seba înan zaf muhîm o û wina qedêna: "Nê xoverdayîşê Mehmed Uzunî bingeyê projeya ma viraşt. Ma bi raya karîkaturî mucadeleyê ey dewam kenê."