Hemşaredara Şaredarîya Amedî ya Bajarê Girdî Dogan Hatun ke beşdarê beyanatê çapemenîye bî ke derheqê xebatanê madenî yê Newala Kasorî ya qezaya Pasûrî de ame dayene, bale ant çimeyê awe yê herême û va: "Eke şima wazenê xizmetêk bikerê, şima eşkenê tîya seba turîzmî akerê."

Platformê Pawîtişê Newala Kasorî, derheqê xebatanê madenî yê Newala Kasorî de ke Akdoruk, Islamkoy, Narlica, Agacli, Agilli, Dolun, Hevedan û Kaynak ke dewa Pasûrî ya girêdayeya Amedî de yê, beyanatê çapemenîye organîze kerd. Hemşaredarê Şaredarîya Amedî yê Bajarê Girdî Dogan Hatun, Hemşaredarê Şaredarîya Baglarî Sirac Çelik, Hemşaredarê Şaredarîya Pasûrî Murat Ipek, Parlamenterê Partîya Seypêyî û Demokrasî yê Şaran (DEM Partî) Serhat Eren û Ceylan Akça, şarê ke dewanê herême de ciwîyenê û temsilkarê rêxistinanê derûdorî beşdarê beyanatî bîyî.

Sekreterê Komîsyonê Derûdor û Bajarî yê Baroya Amedî Ahmet Înan û Parlamenterê DEM Partî Serhat Eren ke nameyê platformî ser o qisey kerd, hişyarî da ke xebatanê madenî do zerar bido herra herême û awa herême do nêra şuxulnayene.

Hemşaredar Hatun: Tîya de çimeyî est ê ke madanan ra muhîmêr ê

Hemşaredar Dogan Hatun ke beyanat da, va ke awa şimitişî ya herême ne tena şar û tebîetê tîya pê mird beno û wina dewam kerd: "Ma herêma Koyê Hasandinî zaf baş şinasnenê. Binê sîya her darêk de cuye est a. Raşt a, na herême çiqas hewayî ra dewlemend biba, binê herra ci zî hende dewlemend o. Vajîyeno ke tîya de zaf madenî est ê. Ez sey muhendîsêk eşkena tayê çîyan vajî. Binê nê dewan ra heta fekê Pasûrî madenêko dewlemend est o. Gama ke madenkarîye yena kerdene ganî faydeyê komelî bibo. Madenî seba dewletan dewlemendîyêka tebîî yê. La tîya de çimeyî est ê ke madanan ra hîna muhîm ê, sey awe û herre. Ma sey DÎSKÎ tîya de xebata saha ramite. Awa Pasûrî Newala Kasayî ra yena. Teqrîben 12 hezar û 500 kesî na awe ra îstîfade kenê. Kotîyê Tirkîya de cayêko ke tede awa şimitişî est a û madenkarîye yena kerdene?"

'Şima eşkenê tîya seba turîzmî akerê'

Hatunî ard vîr ke herêma Hevedanî 18 dewan û teqrîben 50 mezrayan ra yena meydan û wina va: "Pêro pîya 60 cayê ciwîyayîşî yê. Heme awa înan tîya ra herikîyena. Mesele tena awa tankan de dayene û antene nîya, mesele meseleyê awa binê herr a. Tîya newala awa binê herr a. Tîya de zaf vewre varena û pêro benê awa binê herre. Însanî, heywanî, herre, hêgayî, darî pêro na awe ra îstîfade kenê. Eke şima wazenê tîya rê xizmetêk bikerê; na herême hetê turîzmî ra dewlemend a. Şima eşkenê tîya seba turîzmî akerê."

'Şima do 25 hezar kesan bidê koçkerdene’

Hemşaredar Hatunî qeyd kerd ke dewê herême newala awe ser o yê û wina dewam kerd: "Nê dewan de qet kêmîya awe nêameya ciwîyayene. Gama ke zuwa bîya nê dewan awa xo yewbînan reyde par kerda. Kasorî awa xo şarê Pasûrî reyde pare kerda. Na newala ke kîşta ma de ya, awa xo Hevedanî reyde pare kerda. Na herême awa xo yewbînan reyde pare kena, no kultur hezaran serran ra nat o dewam keno. No kulturêko kadîm o. Gama ke şima tîya kenê ocaxê madenî, verê şima do nê kulturî vîndî bikerê. Şima do na tebîeta pake xirabe bikerê û şima do 25 hezar kesan ke na awe ser o ciwîyenê, bidê koçkerdene. 'Faydeyê şarî' yê naye kotî de yo? Şima do Pasûrî tîya ra bihelnê?