Hemşaredara Şaredarîya Amedî ya Bajarê Girdî Serra Bucak ke beşdarê Çalakîya Polîtîkayanê Cinîyan yê Rayberîyanê Herêmkîyan bîye, hemşaredarê cinî yê şaredarîyan û temsilkarê rêxistinanê cinîyan beyanatê çapemenîye da û bale ante şîdetê ke vera cinîyan de zêdîyeno.

Çalakîya "Polîtîkayanê Cinîyan yê Rayberîyanê Herêmkîyan" ke Merkezê Kultur û Kongre yê ÇandAmedî de ame organîzekerdene, roja dîyine de dewam kerd. Hemşaredara Şaredarîya Amedî ya Bajarê Girdî Serra Bucak ke beşdarê çalakîye bîye, hemşaredarê cinî yê şaredarîyan, Hemşaredara DBB ya Verêne Gultan Kişanak û temsilkarê rêxistinanê cinîyan, derheqê şîdetî de ke vera cinîyan de yo, vera Merkezê Kultur û Kongre yê ÇandAmedî de beyanatê çapemenîye da.

'No hal nêyeno qebulkerdene

Sereka Komela Cinîyan ya Rosa Suzan Îşbilen ke beyanat da, va ke ê seba protestokerdişê qet Îşbilen ard vîr ke vizêrî 4 cinî ameyê qetilkerdene û wina dewam kerd: "Hîrê-çaran ra vêşêr cinî wextê caverdişî de yenê qetilkerdene. Vizêr gama ke ma nê çîyan ser o qisey kerdêne, Amed de cinîyêk vera çimanê gedeyanê xo de ameye qetilkerdene no hal nêyeno qebulkerdene. No êdî bîyo çîyêk ke qetlîamanê cinîyan ra zî zêdeyêr o. Cinî qebul nêkenê ke bibê kole."

'Ma seba cuya seypêye soz danê'

Hemşaredara Şaredarîya Wanî ya Bajarê Girdî Neslihan Şedal zî va ke ê sey rayberîyanê herêmkîyan gama ke polîtîkaya vera şîdetê cinîyan û îdeolojîya cinsîyetparestî ser o qisey kenê, qetlîamê cinîyan dewam kenê. Şedal îfade kerd ke ê do seba her cinîya ke cuye ra ameya birnayene, mucadele bikerê û wina dewam kerd: "Ma ewnîyenê, Gulistan Doku orte de çin a û nêameye dîyayene. Ma hema zî dej û şînê Narîne zereyê xo de ancenê, Rojin Kabaiş hema nêameye dîyayene. Gama ke ma seba ke polîtîkayê cinîyan hîna bihêz biramê, qisey kenê, tîya de vizêrî mîyanê Sûrî de cinîyêk ameye qetilkerdene. Gama ke ma nê mucadeleyî kenê, Stenbol de di cinî ameyê qetilkerdene."

Şedal va ke cinî yenê hedefgirewtene û bi nê hawayî wazenê ke qîymetanê komelî û exlaqî ser o vindîbîayyaîşêk virazê û wina qedêna: "Ma seba cinîyanê ke cuye ra ameyê birnayene soz danê. Ma seba heme ma cuya azad û seypêye awan bikerê, soz danê."