Edebîyatkarê ke beşdarê sohbetî bîyî ke Şaredarîya Amedî ya Bajarê Girdî organîze kerdo, cuye û seruvenê nuştişê ziwanê dayîke yê Nuştox Mehmed Uzunî ke yew kerraya bingeyîne yê edebîyatê kurdkî yo, îzeh kerd.

Çarçewaya çalakîyanê vîrardişê Nuştoxî Mehmed Uzunî de, bi pêşengîya Serekîya Daîreya Karê Kultur û Komelkî yew sohbet ame viraştene. Sohbetî de ke Merkezê Çand û Kongre yê ÇandAmedî de ameye viraştene û moderatorîya ci Lal Laleşî kerd, birayê Mehmed Uzunî yo pîl Mustafa Uzun, nuştoxî Şeyhmus Dîken û Mîzgîn Ronak sey qiseykerdoxan ca girewt. Hemşaredara Şaredarîya Amedî ya Bajarê Girdî Serra Bucak, Sereka Daîreya Karê Kultur û Komelî Çagla Sanay, wendoxê Uzunî, keyeyê ey û embazê ey beşdarê sohbetî bîyî.

Mustafa Uzunî va ke ziwan seba ma mîrasêko pîroz o û sey yew pirdi karê edebîyat û çandî vîneno û bale ant ehemîyetê ziwanî ke ganî her warî de bêro şuxulnayene ser o. Uzunî behsê seruvenê cuye û nuştişê birayê xo Mehmed Uzunî kerd û va ke înan pîya şertanê zaf zehmetan de xebata edebîyatî kerda.

Mustafa Uzunî qisey kerd ke Mehmed Uzun çekuyanê weşan dima fetelîyayêne û va ke ey romanê xo "Tu" senî şert û îmkanan de nuşto.

'Seba ke merdim bibo edebîyatkarêko rind, lazim o ke beranê girdan ra bivîyaro'

Nuştox Şeyhmus Dikenî, kitabê "Zevalsiz Ömrün Sürgünü" (Sirgûnê Emrê Bêzewalî) ard vîrî ke tede behsê 15 aşmî keno ke wextê nêweşîya Uzunî de Amed de ey reyde vîyarnayo û cuya Uzunî îzeh kerda. Dikenî va ke ey verê kitabê Uzunî "Sîya Evînê" û "Bîra Qederê" tirkî wendî û dima ke kurdkîya xo aver şîye, ey kurdkîya înan wend. Dîkenî va "Mi tamê kurdkîya ke cuya rojane de yena şuxulnayene, girewte. Uzun kesêk o ke 500 çekuyê ke nêzdîyê vîndîbîyayîşî bîyî, reyna ardî ziwan."

Mizgin Ronak zî, sey yew wendoxe va ke gama ke aye hepisxane de bîya, aye zaf feyzo rind Mehmed Uzunî ra girewto û metaforê Xalxalokî ke romanê "Tu" de vîyarena, îzeh kerd.