Hemşaredara Şaredarîya Amedî ya Bajarê Girdî Serra Bucak, bale ante ehemîyetê 11ê Teşrîna Verêne Roja Gedeyanê Kêneknan ê Dinya ser o û va "Ma nê erdî de zafîya ma qîm kena ke ma do heqanê gedeyanê kênekan û cinîyan bipawê.”
Şaredarîya Amedî ya Şaristanê Girdî û Tora Xebata Gedeyan ê Amedî, derheqê 11ê Teşrîna Verêne Roja Kêneknanê Dinya de Cayê Ciwîyayîşê Pîyayî yê Sumerparkî de beyanatê çapemenîye da. Beyanatî de Hemşaredarê Şaredarîya Bajarê Girdî Serra Bucak û Dogan Hatun, serekê daîreyan û temsilkarê rêxistinanê komelê sivîlî beşdar bîyî.
'Îhlalê ke vera gedeyanê kênekan benê, zêdîyayî'
Endama Tora Xebatanê Gedeyan ya Amedî Selvî Tunc ke beyanato nuştekî wend, ard vîrî ke bi welatan ke Tirkîya zî tede ca gêna, Neteweyê Yewbîyayeyî serra 2012î de 11ê Teşrîna Verêne kerde Roja Kênekenan ê Dinya. Tunc bale ante ke hûmara îhlalanê heqan ê ke kêneken ser o benê, resayî cayêkî ke êdî nêyena hûmatiriş û aye behsê îhlalê heqan ê ke benê, kerd. Tunc îfade kerd ke heta ke gedeyî biresê îdealê ciwîyayîşê bi aram yew dinya ya adîl, azad û seypêye, ê do mucadeleyê heqan dewam bikerê.
Hemşaredare Bucak: 11ê Teşrîna Verêne rojêka xisusî ya
Hemşaredare Serra Bucak ke beyanatê çapemenîye de qisey kerd va ke ê sey rêxistinê komelê sivîlî yê bajarî, komel û dernegê ke Amedî de warê heqanê gedeyan de xebatan kenê, temsilkarê Meclisê Bajarî yo ke di aşman ra ver ame awankerdene, hemşaredarê Şaredarîya Bajarê Girdî, îdare û endamê meclîsî, seba 11ê Teşrîna Verêne Roja Kênekenanê Dinya yew vengdayîşê hişyarîye bikerê ameyî têhet. Hemşaredare Bucak bale ante ke 11ê Teşrîna Verêne Roja Kêneknanê Dinya, 12 serrî yo ke vera polîtîkayanê cîyakerdiş ê ke gedeyê kênekî heme dinya de rastê înan yenê û maruzê înan manenê, seba ney rojêka xisusî ya û wina dewam kerd: "Ma zî erdê xo de, bajaranê xo de serrê dergî yê ke ma warê heqanê gedeyan kede danê, merkezê heme xebatanê ma de; xebatê ma yê ke goreyê cinsîyetê komelkî benê, xebatê ma yê saha ke ma tede seypêyîya cinsîyetê komelkî ser o vindenê ronayî. Reyna ma pratîkê xo yê rayberîya herêmkî ke ma tede tetbîqatê cinsîyetê komelkî ver de girewtî, vetî meydan. Ewro ma sey rayberîyê herêmkî wazenê ehemîyetê resayîşê cayêk de ke ma eşkenê hîna bi hêz û hîna bi bingeyêko raşt bixebitîyê, hem bi rêxistinanê komelê sivîlî ke nê warî de xebatan kenê, hem bi embazanê xo yê ke nê warî de kede daya û pratîkanê weşan ê pisporîye vetê meydan û hem zî Meclisê Gedeyan yê Meclisê Bajarî, îfade bikerê."
'Ma wazenê na roje Ceylane, Narîne û Rojîne rê bike dîyarî'
Hemşaredare Bucak soz da ke ê do sey Şaredarîya Bajarê Girdî û şaredarîyê qezayan reyde xebatêk bikerê ke seba vernîgirewtişê polîtîkayanê cîyakerdişî yê warê heqanê gedeyan û pawitişê heqanê tewr cor yê cinîyan, verê zî yê kêneken bêrê pawitene û wina va: "Roja Kêneknanê Dinya de erdê ma de kênekê ma yê ke sebebanê cîya-cîyayan ra cuya xo vîndî kerda, ameyê kiştene est ê. Ma wazenê na roje Ceylane, Cemîle, Narîne û Rojîne rê bike dîyarî. Gama ke cesedê Narîne ame dîyayene, bajar travmayêka girde ciwîya û no bajar roja verêne ra yo ke perseno û persayîşê xo dewam keno,Narîne se bîye? Ma wazenê îfade bikerê ke ma do erdê xo de qetlîamê cinîyan û çîyê ke ameyê sereyê kênekanê ciwanan û gedeyan dima şêrê."
'Ma do heqanê ciwîyayîşî bipawê'
Bucak bale ante ke 11ê Teşrîna Verêne Roja Kênekanê Dinya her demî ra vêşêr manaya pîle îfade kena û wina qisey kerd: "Ma şexsê Narîn û Rojîn Kabaişî de soz danê ke ma do heqê ciwîyayîşî yê heme gede û cinîyanê ke erdê ma de ameyê vîndîkerdene, emrê gedeyîye de cuye ra ameyê birnayene, ma înan bipawê û ma do hertim seypêyîya cinsîyetê komelkî rê vengê xo berz bikê."
Peymana Îstanbulî
Hemşaredare Bucak bale ant ke bi polîtîkaya pawitişê faîlan û dadgehkerdişê ke bêceza verdenê ê hukmatî û dewletî çi heyf ke wijdanê komelî de derbanê girdan akenê û wina dewam kerd: "Xoantişê Tirkîya yê Peymana Îstanbolî ra, serranê peyênan de her roje bi qetlîamê cinîyan, kiştişê cinîyan nê komelî tena verdano. Rojêka ma çin a ke ma bi kiştişê cinîyan û gedeyan hişyar nêbê. Ma nê erdî de hukmatan ra hîna gird ê, hîna zaf ê. Ma nê erdî de zafane yê ke do heq û azadîya gedeyan, kêneknanê ciwanan, cinîyan, her kesê nê komelî, heqanê înan ê ciwîyayîşî bipawê. Bes o ke ma halê xo yê zafaneyîye fehm bikerê û tatbîqatanê nê fikirê xo yê zafane û azadîye rayberîyanê herêmkîyan de, bajaranê xo de eşkera bikerê. Ma heme keyeyanê xo, cinîy û camêrdan dawet kenê ke bibê parçe û xebatkarê zerrîwazê nê perwerdeyî ke bi merkezanê mişewredarîye ke ma do bajaranê xo de, taxanê xo de awan bikerê, merkezanê hişyarîye ke ma do seba heqanê gedeyan awan bikerê û perwerdeyî yê ke ma do bikerê."
Bucak qeyd kerd ke ê do xebatanê Meclisê Gedeyan û Meclisê Ciwanan ke ê do binê banê Meclisê Bajarî de bikerê, bi sewîyeya tewr berze dewam bikerê.
