Şaredarîya Amedî ya Şaristanê Girdî atolyeya weşîye organîze kerd û cinî derheqê nîşan û metodanê tedawîya kanserê çiçikan de ameyî agahdarkerdene.

Serekîya Daîreya Xizmetanê Cinî û Keyeyan seba "Aşma Hişyarîya Kanserê Çiçikan" Merkezê Cuya Cinîyan yê Taxa Lalebeyî ya Qezaya Sûrî de atolyeya weşîye organîze kerd.

Atolye de ke cinîyê Lalebeyî beşdar bîyî, Hemşîre Raîfe Camci ya Meclîsê Cinîyan yê Sendîkaya Kedkaranê Weşîye û Xizmetanê Sosyalan (SES) yê Amedî derheqê nîşan û tedawîya kanserê çiçikan û senî cinî eşkenê bi xo çiçikanê xo muayene bikerê, melumatî dayî.

'Tesbîto veren û tedawîyo muhîm o'

Camci dîyar kerd ke her 12 cinîyan ra yew kanserê çiçikan gêna û qîmetê tesbîto veren û tedawî ser o vinderte. Camci va ke tesbîto veren ê kanserê çiçikan bi muayeneyanê ke cinî bi xo kenê zî mumkin o û wina dewam kerd: "Nîşanê kanserê çiçikan o tewr muhîm, dormeyê çiçikan yan zî binê çengan de yew çî yo ke dest pira gêno. Nê werameyî yan zî çîyê ke dest pira gênê, tayê halan de dejenê, tayê halan de zî nêdejenê. Ganî no nîşanê vilabîyaye bêro dîqqetgirewtiş."

Demê Tetbîqkerdişê Muayeneyan

Camci îfade kerd ke muayeneyê kanserê çiçikan bi ultrasonografîya çiçikan, cinîyanê ser 40 serreyî de zî bi mamografî beno û wina va: "Mabênê 40 û 50 serreyî de her di serran de rey, kesanê serê 50 serreyî de zî her serre reyçk mamografî yeno pêşnîyazkerdiş."

Camci seba ke rîskê kanserê çiçikan bêro kêmîkerdiş, tayê pêşnîyazî kerdî û qîmetê xopawitişê weşî bi zafêrî sewze û meyweyan, mendişê giranîya weşîye de û aktîvîteyê fîzîkî ser o vindert.