Hetê Şaredarîya Amedî ya Şaristanê Girdî ra 2 werdxaneyanê mekteban de kontrolê xidayan de, 80 kîlo goştê kerge ke tarîxê ey vîyarto, şaredarî dest ser na.

Şaredarîya Şaristanê Girdî, seba ke wendekarî xidayê weşî û pak biwerê, xebatanê xo dewam kena. Na çarçewa de Serekîya Daîreya Karanê Weşîye û Zabitayan 10 rojan werdxaneyê mekteban kontrol kerd.

Kontrolan de ke Ekîbê Kontrolê Xidayan û personelê Serekîya Daîreya Zabitan pîya kerdî, 2 mekteban de 80 kîlo goştê kerd ke tarîxê ey vîyarto, şaredarî dest ser na.

Ceza ameye dayene

Ekîban derheqê îdareyê mekteban de prosesê qanûnî kerdî û goştê ke zerar danê weşîye îmha kerdî. Bi na xebate vernîya jahrîya xidayan ameye girewtene.

300 kîlo pirinc ame destserronayene

Sewbîna, Koordînasyonê Kontrolê Xidayan ke Şaredarîya Şaristanê Girdî rayberîya ey kena, şaristanî de marketê zincîrîyan kontrol kerdî. Kontrolanê ke 2 hefteyê peyênan de bîyî, 300 kîloyî pirinco xirabîyaye dest ser na û îmha kerd.

'Ma her tewir tedbîrî gênê'

Serekê Daîreya Karanê Weşîye Vahap Saçaklî va çîyo ke eleqedarê weşîya wendekaran û şarî yo, ê do bê fedakarî heta peynî xebatanê xo dewam bikerê.

Saçaklî nê çîyî va: "Ma do dewam bikê ke kesê ke weşîya şarî reyde kay kenê, îfşa bikê. Ma seba ke wendekarê ma bieşkê xo biresnê xidayê weşî, her tewir tedbîrî gênê. Kontrolê ma kantînanê mekteban de zî dewam kenê. Şarê ma gazinanê xo yê derheqê xidayan de eşkeno vengdayîşê ALO 153î ra vajê."

Serekê Daîreya Zabitan Veysî Ruzgarî zî va ke cezayê lazimî ameyî dayene û malê ke kewtî destê ma, seba îmhakerdişî ameyî girewtene.

Şaredarîya Şaristanê Girdî, seba ke şar bieşko xo biresno xidayê emînî, her tewir tedbîrê lazimî do bigêro û kontrolan dewam bikero.