Hemşaredara Şaredarîya Amedî ya Şaristanê Girdî Serra Bucak, beşdarê rayîrşîyayîş û tazîyeyî bîye ke seba Rojîn Kabaîş ya wendekara unîversîte amebî organîzekerdiş.

Seba Rojîn Kabaîş ya wendekara Unîversîteya Yuzuncuyilê Wanî de badê 18 rojan meyîtê aye ame vînayene, Amed de rayîrşîyayîşêk ame organîzekerdiş. rayîrşîyayîşî de Hemşaredara Şaredarîya Amedî ya Şaristanê Girdî Serra Bucak, Hemşaredara Şaredarîya Wanî ya Şaristanê Girdî Neslîhan Şedal, Hemşaredara DBB’yî ya verêne Gultan Kişanak, Verfeka Meclîsê Cinîyan yê DEM Partî Halîde Turkoglu û temsîlkarê rêxistinanê cinîyan, Parka Goletlîyî yê Qezaya Baglarî de ameyî têhet û heta Keyeyê Sersaxîye yê Ebdurrehman Encî ke tîya de sersaxîya Rojîn Kabaîş yena dayene, şîyî.

Badê rayîrşîyayîşê bêvengî, verê keyeyê sersaxîye de beyanat ame dayene.

Badê beyanatî Hemşaredare Bucak û cinîyê ke beşdar bîy, şîyî keyeyê tazîyeyî û keyeyê Kabaîş rê serweşîye waşte.