Şaredarîya Amedî ya Şaristanê Girdî, seba ke kutikê kuçeyî ke kanser bîyo reyna weşîya xo apey bigîro, tedawîyê kemoterapî da destpêkerdene.

Şaredarîya Şaristanê Girdî, seba pawîtişê stargeh, wer û weşîya heywananê kuçeyan xebatanê xo dewam kena.

Federasyonê Heqanê Heywanan (HAYTAP), seba ke kutikê kuçeyî ke Unîversîteya Dîcle de teşxîsê kanserî ameyo ronayene, Serekîya Daîreya Karanê Weşîye ra waşt ke bêro tedawîkerdiş.

Kutiko ke Unîversîteya Dîcle ra ame girewtene, hetê baytarî ra ke Serekîya Daîreya Weşîye de wezîfedar o, Merkezê Pawitişê Heywanan û Rehabîlîtasyonî de dekewt binê tedawî.

Badê tetkîkanê ke hetê baytaran ra ameyî kerdene, qerar ame dayene ke kutikê kuçeyî rê kemoterapî bêro tetbîqkerdene.

'Tedawîyê kemoterapî yo verên ame kerdene'

Serekê Daîreya Karanê Weşîye Vahap Saçaklî derheqê babete de melumatî dayî û va ke embazê ma yê canî rê kemoterapîya verêne ameya kerdene. Saçaklî qîmet da her ganî ser û wina dewam kerd:

"Ma ke embazanê xo yê ekîbî reyde ameyî wezîfe ser, ma sloganê 'Amed Bajarê Dostê Heywanan' viraşt. Seba ma her gandar qîmetdar o. Na çarçewa de Temsîlkara HAYTAPî ya Şaristanî Sevgî Xanim, Unîversîteya Dîcle de telefon kerd ma rê û va ke kutiko ke teşxîsê kanserî ameyo dayene est o. Ma zî naye embazanê xo yê baytaranê pisporan reyde qisey kerd û ma kutik Unîversîteya Dîcle ra girewt û ma sitargehê xo de kerd mêman. Ma embazê xo yê canî rê tedawîyê kemoterapî yo verên da. Ma bawer kenê ke ma bi hêzê heskerdişî nê embazê canî do apey bîyarê cuye."

Rojanê ameyoxan de prosesê tedawîya kutikê kuçeyî ke plan beno 2 dozî kemoterapi bêro tetbîqkerdene, do zelal bibo.