Şaredarîya Amedî ya Şaristanê Girdî, seba ke cinîyan derheqê nîşananê û tedawîyê kanserê çiçikan û fekê rehmî de agahdar bikero, Semtê Ben û Senî de atolyeya weşîye organîze kerd.

Serekîya Daîreya Xizmetanê Cinî û Keyeyan, seba "Aşma Hişyarîya Kanserê Çiçikan" atolyeya weşîye ya diyine Semtê Ben û Senî yê Qezaya Yenîşehîrî de viraşte.

Hetê hemşîreyan ra ke Serekîya Daîreya Karanê Weşîye ya Şaredarîya Şaristanê Girdî û Merkezê Weşîye yê Şaredarîya Baglarî de wezîfedar ê, tansîyonê cinîyanê ke beşdarê atolye bîyî ame girewtene. Goreyê tansîyonî tayê cinîyî ameyî şawitene hekîmanê keyeyan.

Dima hemşîre Gulcîhan Saka bi kurdkî û tirkî derheqê "Kanserê Çiçikan" û "Kanserê Qirika Rehimî (Servîks)" de cinîyan rê melumatî dayî. Saka îfade kerd ke bi zêdebîyayîş û girdîbîyayîşê anormalê hucreyanê ke qirika rehimî gênê, kanserê qirika rehimî virazîyeno û wina va: "Dinya de cinîyanê binê 45 serreyan de kanserê tewr zaf yeno dîyene, dîyîne no yo. Nîşanê ey eşkenê nimite bimanê la kanserêko wina yo ke teşhîsan de yeno tesbîtkerdene."

Saka bale ant ser ke sebebê tewr vilayeyî yê nê tewirê kanserî ra yew vîrusê HPV yo û va ke testê Smear ke metodêko bêdej yê kanserî yo, seba pawitişê kanserê qirika rehimî zaf muhîm o.

'Teşxîso veren muhîm o'

Saka va ke xurtkerdişê sîstemê xoverdayîş û xopawitişê weşî zî metodê pawitişî ra yê. Saka dima nîşaneyê kanserê çiçikan îzeh kerd û qîmetê teşxîsê verenî ser o vinderte.

Badê atolyeyan, waştişê cinîyan ser o hemşîreyan muayeneyê çiçikan kerd.

Perwerdeyê pakî û weşîya dindanan seba gedeyan

Atolyeya weşîye de reyna hetê personelanê weşîye ra ke girêdayeya Serekîya Daîreya Karanê Weşîye yê, gedeyê 9-14 serreyî ke ameyê kursê kompûterî yê Merkezê Cuya Cinîyan, derheqê pakî û weşîya dindanan de ameyî agahdarkerdene.