Mêmanê ke seba Kombîyayîşê Pîyayî yê Heyetê Îdare û Konseyê UCLG-MEWA'yî ke bi mêmandarîya Şaredarîya Amedî ya Şaristanê Girdî do bêro organîzekerdene ameyî bajar, cayanê tarîxî û kulturîyan ra gêrayî. Hemşaredarî Serra Bucak û Dogan Hatun, badê gêrayîşî resepsîyon de mêmanan reyde ameyî têhet.

Seba kombîyayîşê pîyayî yê Rêxistina Herêma Rojhelatê Mîyanênî û Asyaya Rojawanî ya Şaristananê Yewbîyayeyan û Îdareyê Herême (UCLG-MEWA) ke 23-24ê Teşrîna Verêne de bi mêmandarîya Şaredarîya Amedî ya Şaristanê Girdî do bêro viraştene, nêzdîyê 30 serekê şaredarîyanê şaristananê girdan û hemşaredarî û îdarekeranê neteweyî û mîyanneteweyî ameyî Amed.

Şaredarîya Şaristanê Girdî, seba mêmanê ke ameyî Amed, aktîvîteyêka gêrayîşî ya cayanê tarîxî û kulturîyan organîze kerd.

Rehberê Mudirîya Şaxê Turîzmî ya girêdayeya Serekîya Daîreya Karanê Kultur û Sosyalan, aktîvîteya gêrayîşî de bi îngilîzkî û erebkî derheqê cayanê tarîxî û kulturyan yê Amedî de melumatî dayî mêmanan.

Mêmanî ke endamê meclîsî û personelanê Şaredarîya Şaristanê Girdî reyde bîyî, rêz bi rêz Îçkale, Camîya Hz. Suleyman, Dêra Surp Gîragos, Minareyê ÇarLinge, Xanê Hesen Paşayî, Camîya Pîle, Çarşîya Şewitî, Keyeyê Dengbêjan û Koşka Cemîl Paşayî ra gêrayî.

Hemşaredarî resepsîyon de mêmanan reyde ameyî têhet

Mêmanî dima şîyî Koşka Cemîl Paşayî. Hemşaredarê Şaredarîya Şaristanê Girdî Serra Bucak û Dogan Hatun, resepsîyon de ke koşke de ame dayene, mêmanan reyde ameyî têhet û sohbet kerd.