Hemşaredarê Şaredarîya Amedî ya Şaristanê Girdî Serra Bucak û Dogan Hatun, seba pîrozkerdişî şîyî zîyaretê Ebdulqadîr Guleçî ke Serekîya Baroya Amedî rê û endamê heyetê îdareyî rê ameyo weçînayene. Hemşaredaran bale ant tarîx û mîsyonê baro ser o û va ke seba temînkerdişê huqûqî baro wayîrê muhîmîyêka zaf gird o.
Hemşaredarê Şaredarîya Şaristanê Girdî Serra Bucak û Dogan Hatun, Ebdulqadîr Guleç ke Serekîya Baroya Amedî rê ameyo weçînayene zîyaret kerd. Zîyaretî de Parlamentera DEM Partî Edalet Kaya, Hemserekê DEM Partî yê Bajarê Amedî Gulşen Ozer û Abbas Şahîn û endamê heyetê îdareyî Hemşaredaran reyde bîyî.
Hemşaredarî, awanîya Serekîya Baroya Amedî de hetê Guleç û endamê heyetê îdareyî ra ameyî qebulkerdene.
Hemşaredare Bucak: Tarîx û mîsyonê baro seba herême bêmunaqeşe yo
Hemşaredare Bucak ke zîyaretî de qisey kerd, Serekê Baro Guleç û îdareyî pîroz kerd û seba wezîfeyanê înan serkewtiş waşt. Bucak dîyar kerd ke nasname, tarîx û mîsyonê Baroya Amedî seba bajar û herême bêmunaqeşe yo û va ke baro seba heq û huqûqî pratîkê tewr muhîmî mojnena. Bucak qeyd kerd ke ê şahidê nê pratîkan ê û wina dewam kerd: "Şima mîrasêko muhîm girewt. Ma bawer kenê ke şima û endamê heyetê îdareyê baro, seba têkoşînê demokrasî, edalet û yewhukûqîya nê bajarî eynî xebatan do bikerê. Ma zî çar serranê verê ma de, sere de Baroya Amedî heme rêxistinê komelê sivîlî, odayê ma, sendîkayê ma û dînamîkê bajarî reyde xebata pîyayî hîna biqewet dewam kenê. Ma yew hêvî zî zereyê xo de seba ameyoxî vînenê."
Hemşaredar Hatun: Baroya Amedî sazgehêka muhîm a
Hemşaredar Hatunî zî îfade kerd ke Baroya Amedî sazgehêka zaf muhîm a û wina va: "Sazgehêka ke roja ke awan bîya û heta ewro kewta xorînîya problemanê bajarî. Sazgehêka ke rojanê zehmetî de bi bedelanê giranan ser huqûq û heqanê însanan de îsrar kerda. Nimûneya tewr rinde ya naye, o yo ke Tahîr Elçî canê xo nê rayîrî de da. Seba temînkerdişê huqûqî baro wayîrê muhîmîyêka zaf gird a. Ma seba îdareyê neweyî yê weçînayeyî serkewtiş wazenê."
Guleç: Ma do pîya bixebitîyê
Serekê Baroya Amedî Guleçî dîyar kerd ke baro qadê têkoşînê komelkî de wayîrê tarîxêkê 50 serrî ya û îfade kerd ke baro nê têkoşînî de bedelê giranî dayê. Guleçî ard ziwan ke ê do zaf waran de îdareyê herême reyde pîya bixebitîyê û qeyd kerd ke baro baroya heme bindestan a. Guleçî seba zîyaretî ra Hemşaredaran Bucak û Hatunî rê sipas kerd.
Zîyaretî de Parlamentera DEM Partî Edalet Kaya, Hemserekê Bajarê Amedî Gulşen Ozer û Abbas Şahînî zî qisey kerd.
