Destpêkê Kombîyayîşê Pîyayî yê Heyetê Îdare û Konseyê UCLG-MEWA’yî de ke bi mêmandarîya Şaredarîya Amedî ya Şaristanê Girdî yeno organîzekerdene, Hemşaredare Serra Bucak va ke cayo ke tede aştî çin a, xizmetê şaredarîye tede hertim kêmî manenê û wina dewam kerd: "Tam wextê ey o ke ma têkilîya mabênê herêman bikerê xurt û tora piştîdayîşî awan bikê."

Kombîyayîşê Pîyayî yê Heyetê Îdare û Konseyê Rêxistina Herêma Rojhelatê Mîyanênî û Asyaya Rojawanî ya Şaristananê Yewbîyayeyan û Îdareyê Herême (UCLG-MEWA) bi mêmandarîya Şaredarîya Şaristanê Girdî Amedî de dest pêkerd. Kombîyayîşo ke Otelê Wyndham Gardenî de bi temaya "Dîplomasîya Herême: Awankerdişê Ameyoxê Bajarî" ame organîzekerdene, tede Hemşaredarê Şaredarîya Amedî ya Şaristanê Girdî Serra Bucak û Dogan Hatun, Sekreterê Pêroyî yê UCLG-MEWA’yî Mehmet Duman û nêzdîyê 30 serekê şaredarîyanê şaristananê girdan, hemşaredarî û îdarekerê neteweyî û mîyanneteweyî beşdar bîyî.

Duman: Ma seba xurtkerdişê îdareyê herême xebitîyenê

Sekreterê Pêroyî yê UCLG-MEWA’yî Mehmet Dumanî ke destpêkê kombîyayîşî de qisey kerd, va ke ê şanazîya pîrozkerdişê serra 20. ya ronayîşê UCLG-MEWA’yî ciwîyenê û qeyd kerd ke rêxistina înan a ke dewamê komkerdişêkê 100 serrî ra zêdeyêr a, 20 serran ra herême de bi qerardarîye seba xurtkerdişê îdareyê herême û resayîşê rojeva herême ya globale xebitîyena. Dumanî wina va: "Ez bawer kena ke ma do pîya gameyanê awankerdişê bajaranê bihêz û dewamkerdeyan bierzê. Kulturê dewlemend û cayê stratejîk yê Rojhelatê Mîyanênî hertim muhîmîya xo pawita. La herêma ma ewro bi kaosêko zaf ciddî rî bi rî ya, vera probleman sey hêzê zereyî û teberkî mucadele kena. Na rewşe sere de îdareyê herême û heme sazgeh û dezgehê ke herême de yê û şarê herême rê tesîr kena. Ma sey îdareyê herême ganî vera nê zehmetîyan piştîdayîşî zêde bikê, bi fehmêko ke têduştî, aştî û edaletî hîra gêno, hereket bikê."

Hemşaredare Bucak: Ma şanazîya mêmandarîyê kenê

Hemşaredara Serra Bucak zî va ke ê sey Şaredarîya Amedî ya Şaristanê Girdî şanazî û heyecanê mêmandarîya Kombîyayîşê Pîyayî yê Heyetê Îdare û Konseyê UCLG-MEWA’yî ciwîyenê û wina dewam kerd: "Bajarê ma, sey tarîxê xo yo dewlemend û keheno hezar serran, ewro zî kulturê cîya-cîyayan, ziwanan, bawerîyan û nasnameyan ano têhet û dewam keno ke bibo yew noqtaya têresayîşê berhemdarî."

'Ma do encamanê başan bigîrê'

Hemşaredare Bucak qeyd kerd ke ê di rojan de kombîyayîşan de babetê muhîmî ke rojeva bajaran de yê û qadê mesûlîyetê bingeyinî yê îdareyê herême gênê, tede munaqeşe kenê û wina va: "Serekê şaredarîyan, hemşaredarî, pisporî û mamostayê ma yê erjayeyî do ma reyde bê. Ma do nê munaqeşeyan ra bi qonaxêko berz îstîfade bikê û seba bajaranê ma encamanê başan bigîrê. La ma kêmî yê û bi xemgînîya kêmîbîyayîşî ameyê têhet. Ma waştêne ke ma bieşkayê serekê şaredarîyan û îdarekeranê heme parçeyanê Rojhelatê Mîyanênî û Asyaya Rojawanî reyde bêrê têhet. Serekê UCLG-MEWA’yî yo erjaye Tayseer Abu Sneineh, serekê şaredarîyanê endam, temsîlkarê îdareyê herêmî ke ganî ewro tîya de ma reyde bibîyêne, seba sîyasetanê şer, qirkerdişî û dagîrkerdişî yê welatanê xo û herêmanê xo nêeşkayî sey fîzîkî beşdarê kombîyayîşî bibê."

'Azadîya hereketkerdişê mi ameya sînorkerdene'

Hemşaredare Bucak; "Ma wazenê ewro mîyanê ma de serekê şaredarîyan het, piştîdayîşê xo yê şaranê ke herêma Rojhelatê Mîyanênî de vera şer, îstîsmar û tecrîtî de yê la her çî ra zêdeyêr vengê xo resnenê heme dinya reyna vajê" û wina dewam kerd: "Ma bawer ê ke yew roje ma do nê salonan bê kêmanî pirr bikê. Ma şik nêkenê ke na bawerî heme parçeyanê ke nê salon de yê, het ra yena parekerdiş. Ez sey yew hemşaredara ke azadîya hereketkerdişê aye hetê hukmatê merkezî ra ameya sînorkerdene wazena qisey bikerî: Sere de Rojhelatê Mîyanênî û erdê Kurdan, cayo ke şer, îşxal, îstîsmar, qirkerdiş, feqîrîye, dişmenîya cinîyan sey sîyasetê şerê xususî ma ser o yeno ferzkerdene, ganî ma bi hawayêko lezabez herêman ra dest pêbikê kanalanê dîplomasîye awan bikê, têkilîya mabênê bajar û herêman bikerê xurt, coka vernîya pirdanê piştîdayîşî yê teberî ya astengî yenê ronayene."

'Astengîyê ma tecrubeyê ma yê muşterekî ma anê têhet'

Bucak bale ant muhîmîya tecrubeyanê muşterekan ser o û qiseykerdişê xo wina dewam kerd: "Ma çend ke cografyayanê cîya-cîyayan de biciwîyê zî, ziwanê cîya-cîyayan qisey bikê zî, nê astengî ma tecrubeyanê muşterekan de anê têhet; îfşa kenê ke no şero sîstematîk, îstîsmar û îdarekerdişo ke tecrîtî ser o yo senî aqilêko muşterek o. Eke aqilo ke tecrît keno, cîya keno û herêman girêdayeyê merkezî keno, muşterek bo, ganî ma zî vera nê aqilî têhetbîyayîş, beşdarîye, prensîbê îdare  û tewr muhîm îsrarê ma yo aştîya komelkî de muşterek bê û modelanê ciwîyayîşî ke goreyê na qerardarîye yê, awan bikê. Ez tîya ra wazena reyna vaja ke dîplomasîya ke herêman de aver şina, xurtkerdişê têkilîya mabênê bajar û herêman seba temînkerdişê aştîyêka dewamkerdox û bi rûmet wayîrê muhîmîyêka gird a. Kanalê dîyalogî ke herêman de abenê, eşkenê vengê şaran biresne qada globale, vernîya çareserîyanê aşitîyanan yê herême û mîyanneteweyî akerê."

'Cehdê bêfonksîyonkerdişê îdareyê herême yeno kerdiş'

Bucak derheqê astengan de ke îdareyê herêmî de rastê ci yenê, wina va: "Vera potansîyelê awankerdişê cuya demokratîk, seypê û azad yê îdareyê herême, ewro (bitaybetî Tirkîya de) ma sey hemşaredarî bi tabloyêk rî bi rî yê ke îdareyê herême bêfonksîyon keno, selahîyetanê înan teng keno, otonomîya înan a malî bi hawayêko pêro bypass keno. Teber ra cehdê ardişê şaredarîyan halêko ke nêeşkê kar bikerê, komel maruzê sîyasetêka qutbîyayîşî maneno. Ma her roje encamê naye bajaranê xo de vînenê. Cinî hetê camêrdan ra yenê kiştene, domanî yenê vindîkerdene, domanî yenê kiştene! Merkezê bajaran rastê halê tewr giranî yê feqîrîye yenê, bêkarîya ciwanan berz a. Ciwan û cinî rî bi rîyê bêameyoxîye û bêhêvîye yê."

'Ganî ma vengê aştî berz bikê'

Hemşaredare Bucak ke dîyar kerd ke ê sey îdareyê herême seba ke yew mesûlîyeto giran û tarîxî bigîrê xo ser, ameyê weçînayene û wina va: "Ganî ma têkilîya mabênê nê waranê probleman ke kewtî têmîyan rind ronê û tewr muhîm zî ganî ma vengê 'aştî' ke tam zereyê nînan de vindeno û seba ma heme hewcedarîyêka lezabez a, berz bikê. Çunke cayo ke tede aştî nêro temînkerdiş, demokrasîya herême zî mehkum a ke bibo yew termê vengî. Cayo ke tede aştî çin a, xizmetê şaredarîye hertim kêmî bimanê. Coka çend ke ma wayîrê kultur, ziwan û bawerîyanê cîya-cîyayan ê zî, tam wextê xurtkerdişê dîplomasîya bajarî, têkilîya mabênê herêman û awankerdişê toranê piştîdayîşî yo."

'Şima bixeyr ameyê bajarê vîr û heskerdişî Amed'

Bucak ke qeyd kerd ke ê sey Hemşaredarê Şaredarîya Amedî ya Şaristanê Girdî seba ke nê prosesî de rolêko aktîf bigîrê xo ser û çîyo ke keweno milê înan, bîyarê ca amade yê, wina va: "Ez qiseyanê xo qedênena û seba ke îmkan da xebata ma ya muştereke, ma Serekê UCLG-MEWA’yî, Sekreterê Pêroyî û xebatkaranê UCLG-MEWA’yî rê sipas kenê. Keda heme embazanê ma weş ba ke nê kombîyayîşî de keda înan est a, ez heme mêmananê ma rê reyna vaja şima bixeyr ameyê bajarê ma, bajarê vîr û heskerdişî Amed. Ez wazena ke munaqeşeyê ke ma do di rojan tîya de biramê hetê îdare ra berhemdar bibê."

Destpêkê kombîyayîşî de reyna Hemşaredarê UCLG-MEWA’yî (Tirkîya) û Serekê Şaredarîya Trabzonî ya Şaristanê Girdî Ehmed Metîn Genç, Hemşaredarê UCLG-MEWA’yî (Felestîn) û Serekê Şaredarîya El Xelîlî Tayseer Abu Sneineh, Sekretera Pêroyî ya UCLGî (Îspanya) Emilia Saiz, Serekê Şaredarîya Balikesîrî ya Şaristanê Girdî û Hetkarê Serekî yê UCLGî Ehmed Akin, Serekê Şaredarîya Konyayî ya Şaristanê Girdî û Serekê Demî yê UCLGî yê 2023-2024î Ugur Îbrahîm Altay, Serekê Şaredarîya Laheyî û Serekê UCLGî (Hollanda) Jan Van Zanen yew bi yew qisey kerdî.

Di rojî roniştişî do bêrê organîzekerdene

Kombîyayîş, badê qiseykerdişanê akerdişî di rojî Kombîyayîşê Heyetê Îdare û Konseyê UCLG-MEWA’yî û roniştişê bi nameyê "Komîteya Dîplomasîya Bajarî û Îdareyê Herême ya UCLG-MEWA’yî: Hemkarîya Mabênê Bajaran", "Dîyalogê Daraxê Berzî: Tesîrê Sosyalî yê Rojewanê Globalî", "Analîzê Herême yê Xoserî (VLR): Analîzê Rojewanê Globalî", "Komîteya Şaristananê Zîrekan û Mobîlîteya Bajarî ya UCLG-MEWA’yî: Herêma MEWA’yî de Resê Bajarî ", "Komîteya Şaristananê Zîrek û Mobîlîteya Bajarî ya UCLG-MEWA’yî: Bajaran de Xoverdayîş û Çareserîyê Zîrekî " reyde dewam keno.

Şaredarîya Dura Plaket da Hemşaredaran 

Badê qiseykerdişanê akerdişî heyetê Şaredarîya Dura ya Felestînî, Hemşaredarî Serra Bucak û Dogan Hatun rê plaket dîyarî kerdî.