Atolyeyê Weşîye yê Şaredarîya Amedî ya Şaristanê Girdî ke çarçewaya 'Aşma Hîşyarîya Kanserê Çiçikan' de cinîyan derheqê kanserê çiçikan û qirika rehimî de agahdar kerdî, qedîyayî.
Serekîya Daîreya Xizmetê Cinî û Keyeyan, Merkezê Cuya Cinîyan de ke Taxa Huzurevlerî ya Qezaya Kayapinarî û Parka Koşuyolî yê Qezaya Baglarî de yê, Atolyeya Weşîye organîze kerd û karkerê weşîye yê Serekîya Daîreya Karê Weşîye û Merkezê Weşîye yê Şaredarîya Baglarî 'Kanserê Çiçikan' û 'Kanserê Qirika Rehimî (Servîks)' îzeh kerd.
Atolye de ke bi haweyê vîzuelî bi kurdkî û tirkî pêşkêşî ameyî kerdene, cinîyî derheqê nîşaneyanê kanseranê çiçikan û qirika rehimî, faktorê rîskî, metodê teşxîs û tedawî de ameyî agahdarkerdene.
'Teşxîso veren tedawî hîna serkewte keno'
Atolye de bale ame antene ke cinîyî eşkenê bi konrolkerdişê çiçikanê xo yê aşmene tewr vurîyayîşê qijkekî ra ver fehm bikerê û ame îfadekerdene ke bi teşxîso veren tedawîya kanserê çiçikan do hîna zaf serkewte bo. Atolye de ke ame vatene testê kontrolî seba ke kanserê çiçikan û rehimî merhelayanê verenan de bêrê tesbîtkerdene ardim kenê, derheqê testê smearî û mamografî de zî malumat ame dayene.
Cinîyê ke beşdarê atolye bîyê, tansîyon, şeker û adirê leşa înan zî ame pêmawitene. Cinîyan ke waşt, çiçikê înan zî ameyî kontrolkerdene.
Sewbîna, 5 merkezê cuya cinîyan de, atolyeyê ke seba Aşma Hîşyarîya Kanserê Çiçikan ameyê organîzekerdene, tede 146 cinî beşdar bîy.
Seba gedeyan perwerdeyê pakî û weşîya didanan
Atolyeya Weşîye de reyna, gedeyê ke odaya kayî ya 5 merkezê cuya cinîyan de ameyî pêser, hetê karkeranê weşîye yê girêdayeyê Serekîya Daîreya Karê Weşîye ra derheqê pakî û weşîya didanan de perwerde dîy."
