Hemşaredaranê Şaredarîya Amedî ya Şaristanê Girdî Serra Bucak û Dogan Hatunî, Qezaya Yenîşehîr de viraştişê Bulwarê Mîr Celadetî û Bulwarê Şêx Seîdî yê 12 kîlometreyî ke do Rayîrê Farqînî û Rayîrê Xarpêtî girêdo yewbînan ra, etud kerd.

Ekîbê girêdayeyê Serekîya Daîreya Kontrol û Viraştişê Rayîr û Binawanîyan, Qezaya Yenîşehîr de xebatê viraştişê Bulwarê Şêx Seîdî yê 12 kîlometreyî û 50 metreyî ke do Rayîrê Farqînî ra bigîro û Çatrayîrê 450 Evler ra heta Çatrayîrê Bulwarê Sultan Sasa yê Rayîrê Xarpêtî resno yewbînan û Bulwarê Mîr Celadetî yê 2 hezar û 200 metreyî ke maneno dewamê Bulwarê Mehabad û Taxa Dokuzçeltîk ra vîyareno û do Bulwarê Şêx Seîdî ra bêro girêdayene, dewam kenê.

Hemşaredaranê Şaredarîya Şaristanê Girdî Serra Bucak û Dogan Hatunî, xebatê ke Bulwarê Şêx Seîdî û Bulwarê Mîr Celadetî de dewam kenê, cayê xo de etud kerd.

Hemşaredaran ke projeyê viraştişê rayîran etud kerdî, derheqê xebatan de ke bulwaran de yenê viraştene, amîranê beşanê eleqedaran ra melumatî girewt û fikrê xo pare kerdî.

Wextê etudkerdişî de Hetkarê Serekê Pêroyî yê Şaredarîya Şaristanê Girdî Azîz Ozdogan û serekê daîreyan Hemşaredaran reyde bîy.