Mudirîya Pêroyî ya DÎSKÎ ya Şaredarîya Amedî ya Şaristanê Girdî, Mezraya Alîyan a girêdayeya Taxa Kuşlukçayirî ya Qezaya Çêrmûge de bîrê sondajî yo 375 metreyî ke erdlerzan ra ziwa bîbî tamîr kerd û hewcedarîya awa şimitişî temîn kerd.

Mezraya Alîyan a girêdayeya Çêrmûge de şar seba ke hewcedarîya xo ya awa şimitişî temîn bikero serranê vîyarteyan de bi îmkananê xo bîrêko sondajî yo 375 metreyî kendbî. Bîro ke hewcedarîya awa mezra temîn kerdêne, erdlerzanê ke 6ê Sibate 2023î yê Mereşî de bîy ra ziwa bî. Nê tarîxî ra dima şarê mezra ke problemê awa şimitişî antêne, demê qeyyûmî de rewşe ekîbanê Mudirîya Pêroyî ya DÎSKÎ ra va, la waştişê înan munasib nêameyo dîyene.

Şarê Mezraya Alîyan, aşmanê vîyarteyan de reyna seba tamîrkerdişê bîrî DÎSKÎ ra waşt.

Ekîbanê DÎSKÎ ke dest bi xebate kerd, peyê xebata yew aşme karê elektrîk û teçhîzatê bîrê sondajî kerd û bîr reyna aktîf kerd.

'Hewcedarîya awa şarî ameye temînkerdene'

Teknîkerê Serekîya Daîreya 2. ya Herêma Kargehan ya DÎSKÎ Îlhan Artiş ke teqîbê xebatanê ke Mezraya Alîyan de ameyî kerdene kerd, dîyar kerd ke bîro mehcud badê erdlerzê ke merkezê ci Mereş de bî fonksîyonê xo vindî kerdo û va: "Nê muddet de sazgeha ma bi tankeran awe resna mezra. Teçhîzatê sondajî ke şarê dêsî bê teçhîzat akerdbî, prosesê ey ê kêmî hetê sazgeha ma ra ameyî kerdene û hewcedarîya awa şarî ameye temînkerdene. Ma sey Mudirîya Pêroyî ya DÎSKÎ seba ke ma şarê xo rê awa weş û bêvindertene temîn bikerê xebatanê xo dewam kenê."

'Ma resayî awe'

Enver Gulî ke şarê mezra ra yo îfade kerd ke ey xebatê ke Mudirîya Pêroyî ya DÎSKÎ kerdî, tira keyfweşîye girewta û wina qisey kerd: "Ez Dewe Alîyan de ronişena. Awa ma badê erdlerzî birîya. Di serrî ma bêawe mendî. Nika ma resayî awe. Nê di serran de ma zaf zehmetî ante. Tena nê di serrî seba ma bî îmtihanêko gird. Ma êdî musayî ke ma awe bi îdareyî bişuxulnê, ma muhîmîya ci fehm kerd. Faydeyê nê zî bîy ma rê, êdî awa ma yena. Ez sipasîya xo kena heme kesê ke kedê ci tede est a."

'DÎSKÎ desteg da, êdî awa ma herikîyena'

Cemal Gulî ke şarê mezra ra yo îfade kerd ke awa înan erdlerzî de ameye birnayene û va: "Ma di serrî bêawe mendî. DÎSKÎ zaf desteg da ma. Êdî awa ma herikîyena. Ma sipasîya xo Mudirê ma yê Pêroyî yê DÎSKÎ rê, Serekê Daîreya ma rê, hemîne rê kenê."