Hemşaredaranê Şaredarîya Amedî ya Şaristanê Girdî Serra Bucak û Dogan Hatunî, Stadyumê Amedî de etud kerd, antremanê Amedsporî temaşe kerd. Hemşaredare Bucak va, Amedspor do 9ê teşrîna peyêne de keyeyê xo de kay bikero.

Hemşaredaranê Şaredarîya Şaristanê Girdî Serra Bucak û Dogan Hatunî, Stadyumê Amedî de etud kerd. Hemşaredaran reyde endamê Komîteya Mişawirîya Berze û Heyetê Îdareyî yê Amedsporî zî pîya bîy. Hemşaredaran ke derheqê zemînê stadî de rayberê Amedsporî û berpirsîyarê Mudirîya Şaristanî ya Ciwan û Sporî ra melumatî girewtî, dima şîyî Tesîsê Şehmus Ozerî.

Hemşaredare Bucak: Amedspor şaristanê xo ra dûrî mendo

Hemşaredare Bucak ke Tesîsê Şehmus Ozerî de dîyarkerdişêk kerd, va ke înan Stadyumê Amedî zîyaret û etud kerdo û wina dewam kerd: "Senî ke heme şarê Amedî zano destpêkê sezonî ra heta ewro Amedspor çi heyf ke prosesêko xirab ciwîyayo. Sebebê xirabîya çîmî ya Stadê Amedî û zemînî ke badê kayî xirab bîyo, nêzdîyê hîrê aşmî yo ke keyeyê xo, stad û terefdaranê xo ra dûrî mendo, ma Amedspor de vînenê ke şaristanê xo ra ameyo surgunkerdene. Ma verê naye vaje û tîya ra seba ke nê çîyê neyînî bêrê wedarnayene, veng bidê."

'Ma do heta 9ê teşrîna peyêne de nê prosesî bixelesnê'

Hemşaredare Bucak bale ant ke Amedspor terefdarêko pîl, heyetê îdareyî û komela futbolî ra desteg gêno û qeyd kerd ke nê prosesê neyînî de Amedsporî bi destegê terefdar, heyetê îdareyî, serekê kulubî û endamanê Komîteya Mişawirîya Berze şîyo deplasmanî. Bucakî ard vîr ke Amedspor nêeşkayo keyeyê xo de kay bikero û mecbur mendo ke teber ra kay bikero û wina va: "Tena terefdaran heme cayê Tirkîya de wayîrîye kerde Amedsporî rê la êdî ganî no surgûn biqedîyo. Amedspor do 9ê teşrîna peyêne do de keyeyê xo de kay bikero. Ma teze ke şîyê stad, ma qewlê nê çî berpirsîyarê Mudirîya Şaristanî ya Ciwan û Sporî ra girewtî, ma înan reyde nirxnayîşê lazimî kerdî. Ma do hetkarîya înan reyde heta 9ê teşrîna peyêne nê prosesî bi hawayêko baş bixelesnê û Amedsporê ma do 9ê teşrîna peyêne de musabaqaya xo Amed de biko û do bi serkewtene no demê xo yo xirab peyser de verdo."

'Ma do destegê xo bidê'

Bucak va ke ê sey Şaredarîya Şaristanê Girdî do bi heme îdare, endamê meclîsî û komîsyonê sporî, Serekîya Daîreya Xizmetê Ciwan û Sporî reyde nê prosesî her demî ra zêdêr taqîb bikerê û desteg bidê û wina qisey kerd: "Ma do her çîyo neyînî ke badê ewro vejîyo meydan, ma do wezîfeyê xo bi hawayêko acîl bîyarê ca. Ma wazenê ke tîya ra sipasîya xo bikerê embazan rê ke kede daye, terefdarê Amedsporî ke bi aşitîye û bi hewayêko weş no proses îdare kerd."

HemÅŸaredaran antreman temaÅŸe kerd

Badê qisyekrdişî Hemşaredaran antremanê futbolîstan temaşe kerd û înan rê şîranî îkram kerd.

'Ma futbolîstan reyde yê'

Hemşaredar Bucak va ke ê futbolîstan reyde yê û seba musabaqaya Erzurumî serkewtene waşt.

Hemşaredar Hatun: Waştişê ma yew o

Hemşaredar Dogan Hatunî zî qeyd kerd ke Amedspor tena taximêkê Amedî nîyo û va ke seba înan manewî zaf muhîm o, wexto ke problemêk vejîyo meydan, heme şar tîya de yeno têhet û seba xurtkerdişê taximî kede dano. Hatunî va: "Ma zî nê warî de şima ra tena yew çî wazenê. Ma pîya, bi awanîyêka bihêze û bi koordînasyon bixebitîyê û taximî bîyarê cayêko baş. Bêguman zerrîya ma Lîga Superî wazena. Ez hêvî kena ke destegê ma û kedê şima reyde ma vejîyê Lîga Superî."